ក្នុងរយៈពេលមួយឆ្នាំកន្លងទៅ ដោយសាររងផលប៉ះពាល់ពីជំងឺកូវីដ១៩ សេដ្ឋកិច្ចប្រទេសនានាលើទូទាំងពិភពលោកបានលេចចេញសភាពការណ៍ធា្លក់ចុះជាទូទៅ ហើយការងារប្រយុទ្ធប្រឆាំងនឹងជំងឺកូវីដ១៩នៃប្រព័ន្ធសុខាភិបាលសាធារណៈមិនសូវមានប្រសិទ្ធភាពក៏នាំមកនូវសម្ពាធបន្ថែមទៀតដល់សេដ្ឋកិច្ចនៃបណ្តាប្រទេសនានាផងដែរ ។ ប្លែកពីប្រទេសដទៃទៀត ប្រទេសចិនបានគ្រប់គ្រងការរីករាលដាលនៃជំងឺកូវីដ១៩ដោយជោគជ័យក្នុងរយៈពេលដ៏ខ្លី ហើយបានចាប់ផ្តើមផ្តោតសំខាន់ទៅលើការអភិវឌ្ឍន៍សេដ្ឋកិច្ចផងដែរ ។
កាលពីថ្ងៃទី១៩ខែតុលាឆ្នាំ២០២០ ទិន្នន័យដែលរដ្ឋបាលជាតិស្ថិតិចិនប្រកាសនោះបានឱ្យដឹងថា តម្លៃផលិតផលក្នុងស្រុកសរុបពីខែមករាដល់ខែកញ្ញាឆ្នាំ២០២០របស់ចិនបានកើនឡើង០.៧ភាគរយបើប្រៀបធៀបនឹងរយៈពេលដូចគ្នានាឆ្នាំ២០១៩ ដែលបានបង្វែរស្ថានភាពធ្លាក់ចុះនៅឆមាសទីមួយ ហើយសម្រេចបាននូវការប្រែពីកំណើនអវិជ្ជមានទៅជាកំណើនវិជ្ជមានដោយជោគជ័យ ។ អង្គការសហប្រតិបត្តិការនិងអភិវឌ្ឍន៍សេដ្ឋកិច្ចបានចេញផ្សាយរបាយការណ៏ស្តីពីទស្សនាទានសេដ្ឋកិច្ចពិភពលោកថ្មីបំផុតកាលពីថ្ងៃទី១ខែធ្នូឆ្នាំ២០២០ដោយបានប្រកាសថា ប្រទេសចិននៅតែជាអង្គភាពសេដ្ឋកិច្ចសំខាន់តែមួយគត់ដែលសម្រេចបាននូវកំណើនវិជ្ជមានដដែល ។
ប្រការដែលគួរឱ្យបញ្ជាក់ថា គឺប្រឈមនឹងការវាយប្រហារពីការរីករាលដាលនៃជំងឺឆ្លង ឧស្សាហកម្មថ្មី មុខរបរថ្មីនិងផលិតផលថ្មីនៃប្រទេសចិននៅតែបានរីកចម្រើនទៅមុខយ៉ាងឆាប់រហ័សដដែល។ នៅឆ្នាំ២០២០ អនុបាតនៃតម្លៃបន្ថែមរបស់ឧស្សាហកម្មទី៣នៃប្រទេសចិនក្នុងផលិតផលក្នុងស្រុកសរុបបានឡើងដល់៥៤.៤% ដែលបានលើកកម្ពស់០.២%បើប្រៀបធៀបនឹងឆ្នាំ២០១៩ ។ កំណើននៃតម្លៃបន្ថែមក្នុងមុខរបរផលិតគ្រឿងបរិក្ខារនិងមុខរបរផលិតដោយបច្ចេកវិទ្យាខ្ពស់បានពន្លឿនល្បឿន ប្រការនេះបង្ហាញឱ្យឃើញថា រចនាសម្ព័ន្ធឧស្សាហកម្មបាននិងកំពុងត្រូវបានកែលម្អជាបន្តបន្ទាប់ ។ ព្រមពេលជាមួយគ្នានេះ ការវិនិយោគក្នុងវិស័យឧស្សាហកម្មបច្ចេកទេសខ្ពស់និងសង្គមរបស់ចិន សុទ្ធតែបានកើនឡើងលើសពី១០ភាគរយប្រើប្រៀបធៀបនឹងឆ្នាំ២០១៩ ដែលបានបង្ហាញថា ការកែសម្រួលរចនាសម្ព័ន្ធតម្រូវការរបស់ចិនទទួលបានការវិវឌ្ឍរីកចម្រើនថ្មី ។
នៅឆ្នាំ២០២០ ទំហំពាណិជ្ជកម្មសរុបខាងការនាំចេញនិងនាំចូលរបស់ចិននិងទំហំប្រើប្រាស់ទុនបរទេសជាក់ស្តែងនៃប្រទេសចិនបានសម្រេចកំណើនវិជ្ជមាន ទំហំពាណិជ្ជកម្មសរុបនៃការនាំចេញនាំចូលទំនិញទូទាំងឆ្នាំបានកើនឡើង១.៩ភាគរយបើធៀបនឹងឆ្នាំ២០១៩ ទំហំប្រើប្រាស់ទុនបរទេសជាក់ស្តែងនៅទូទាំងប្រទេសចិនពីខែមករាដល់ខែវិចិ្ឆកាបានកើនឡើង៦.៣ភាគរយល។ល ប្រតិបតិ្តការរបស់ចិនបានដើរតួនាទីដ៏សំខាន់ក្នុងការបំពេញតាមតម្រូវការចំពោះផលិតផលបង្ការនឹងជំងឺឆ្លងនិងធ្វើការក្នុងផ្ទះរបស់ប្រជាជនសកលលោក លំនឹងខ្សែសង្វាក់ឧស្សាហកម្មនិងខ្សែសង្វាក់ផ្គត់ផ្គង់ជាសកល ក៏ដូចជាជំរុញការងើបឡើងវិញនៃសេដ្ឋកិច្ចសកលផងដែរ ។ ក្នុងបរិបទដែលជំងឺកូវីដ១៩រីករាលដាលនៅទូទាំងពិភពលោកនិងសេដ្ឋកិច្ចពិភពលោកធ្លាក់ចុះយ៉ាងខ្លាំង សេដ្ឋកិច្ចចិនបានស្តារឡើងវិញយ៉ាងនឹងនរ តាមការប៉ាន់ប្រមាណ ប្រទេសចិននឹងក្លាយជាអង្គភាពសេដ្ឋកិច្ចសំខាន់តែមួយគត់លើទូទាំងពិភពលោកដែលអាចសម្រេចកំណើនវិជ្ជមាន លទ្ធផលទាំងនេះគឺទទួលបានមិនងាយទេ ។ ហើយប្រការនេះក៏មានសារសំខាន់ចំពោះពិភពលោកដែរ ។ ទីភ្នាក់ងារសារព័ត៌មាន Bloomberg បានផ្សាយដំណឹងថា កំណើនរបស់ចិនបាននិងកំពុងជួយឱ្យសេដ្ឋកិច្ចសកលងើបឡើងវិញ ៕
អ្នកបកប្រែ：Sun Lingling