ថ្ងៃទី១៩ ខែកុម្ភៈ ក្រសួងការពារចិនបានចេញផ្សាយអត្ថបទដែលមានចំណងជើងថា «លោក Ren Guoqiang អ្នកនាំពាក្យក្រសួងការពារជាតិចិនឆ្លើយតបនឹងអ្នកសារព័ត៌មានស្តីពីវីរភាពរបស់នាយទាហាននិងពលទាហានតស៊ូនៅជួរមុខដើម្បីការពារព្រំដែន » ។
លោក Ren Guoqiang បានថ្លែងថា នៅខែមិថុនាឆ្នាំ២០២០ កងទ័ពឥណ្ឌាបានឆ្លងចូលព្រំដែនចិនដោយខុសច្បាប់ ក្នុងចេតនាបង្កការប៉ះទង្គិចនៅជ្រលងភ្នំGalwan បណ្តាលឱ្យកងកម្លាំងភាគីទាំងពីររងរបួសនិងស្លាប់បាត់បង់ជីវិត ភាគីឥណ្ឌាត្រូវទទួលខុសត្រូវទាំងស្រុង ។ បន្ទាប់ពីកើតមានការប៉ះទង្គិច ដើម្បីរក្សាស្ថានការណ៍ទូទៅនៃទំនាក់ទំនងរវាងប្រទេសទាំងពីរនិងកងទ័ពទាំងពីរ ព្រមនិងបន្ធូរបន្ថយស្ថានការណ៍តានតឹង ប្រទេសចិនបានរក្សាភាពអត់ធ្មត់ខ្ពស់ ប្រការនេះបានបង្ហាញឱ្យឃើញនូវចិត្តទូលាយនិងកាតព្វកិច្ចរបស់ប្រទេសធំដែលមានទំនួលខុសត្រូវ ។ ប៉ុន្តែ ភាគីឥណ្ឌាបានឃោសនាបំប៉ោងពីករណី រងរបួសនិងស្លាប់បាត់បង់ជីវិតជាច្រើនលើក មួលបង្កាច់ការពិត បំភាន់ភ្នែកមតិអន្តរជាតិ ព្រមទាំងមួលបង្កាច់កងកម្លាំងការពារព្រំដែនរបស់ប្រទេសចិនទៀតផង ។ ប្រទេសចិនមិនអនុញ្ញាតឱ្យកែប្រែប្រវតិ្តសាស្ត្រដោយផ្តេសផ្តាស ហើយចងចាំពីវីរជនជានិច្ច ។ ប្រព័ន្ធសារព័ត៌មានចិនបានផ្សព្វផ្សាយអំពីវីរភាពរបស់វីរជនជាសាធារណៈ ដោយក្រមសីលធម៌វិជ្ជាជីវៈរបស់ប្រព័ន្ធសារព័ត៌មានដែលត្រូវផ្សព្វផ្សាយព័ត៌មានដោយសត្យានុម័ត ប្រការនេះមានអំណោយផលដល់ការបំភ្លឺពីរពិត និងធ្វើឱ្យអ្នកផងទាំងពួងមើលឃើញច្បាស់ពីអ្វីដែលត្រូវនិងខុស ។
គោលជំហររបស់ប្រទេសចិនក្នុងការដោះស្រាយបញ្ហាព្រំដែនរវាងចិននិងឥណ្ឌា គឺច្បាស់លាស់ណាស់ ពោលគឺជានិច្ចកាល ចិនបានខិតខំប្រឹងប្រែងដោះស្រាយជម្លោះតាមរយៈកិច្ចសន្ទនានិងចរចា ជានិច្ចកាល ចិនបានខិតខំប្រឹងប្រែងគាំពារស្ថានការណ៍ទូទៅនៃទំនាក់ទំនងរវាងប្រទេសទាំងពីរនិងកងទ័ពទាំងពីរ ជានិច្ចកាល ចិនបានខិតខំប្រឹងប្រែងបន្ធូរបន្ថយស្ថានការណ៍តានតឹងក្នុងពេលឆាប់ៗ និងរៀបចំឡើងវិញនូវភាពសុខសាន្តនៅតំបន់ព្រំដែនរវាងចិននិងឥណ្ឌាក្នុងពេលឆាប់ៗ ៕