ថ្ងៃទី ២២ ខែកុម្ភៈ លោកវ៉ាងវិនពីន អ្នកនាំពាក្យក្រសួងការបរទេសចិនបានថ្លែងក្នុងសន្និសីទសារព័ត៌មានជាប្រចាំថា កិច្ចប្រជុំជាន់ខ្ពស់នៃសន្និសីទក្រុមប្រឹក្សាសិទ្ធិមនុស្សនៃអង្គការសហប្រជាជាតិលើកទី ៤៦ បានបើកធ្វើពីថ្ងៃទី ២២ ដល់ ២៤ ខែកុម្ភៈ លោកវ៉ាងយី សមាជិកក្រុមប្រឹក្សាកិច្ចការរដ្ឋនិងជារដ្ឋមន្ត្រីការបរទេសចិននឹងតំណាងឱ្យរដ្ឋាភិបាលចិនឡើងថ្លែងសុន្ទរកថា ដើម្បីចែករំលែកទស្សនៈ ការអនុវត្តនិងបទពិសោធន៍ក្នុងការការពារសិទ្ធិមនុស្សនៃប្រទេសចិន ព្រមទាំងតំណាងឱ្យភាគីចិនលើកឡើងមតិយោបល់និងគោលគំនិតអំពីអភិបាលកិច្ចសិទ្ធិមនុស្សជាសកល ក្នុងន័យជំរុញការបង្កើតសហគមន៍រួមវាសនាមនុស្សជាតិ ។ នេះគឺជាលើកទី ១ ដែលអ្នកដឹកនាំរដ្ឋាភិបាលចិនបានឡើងថ្លែងសុន្ទរកថានៅក្រុមប្រឹក្សាសិទ្ធិមនុស្ស ។
លោកវ៉ាងវិនពីនថ្លែងថារដ្ឋាភិបាលចិនយកចិត្តទុកដាក់ខ្ពស់នូវការជំរុញនិងការការពារសិទ្ធិមនុស្ស ប្រកាន់ខ្ជាប់ទស្សនសិទ្ធិមនុស្សដែលតម្កល់ប្រជាជនជាស្នូល បានបង្កើតជាផ្លូវអភិវឌ្ឍន៍សិទ្ធិមនុស្សដែលសមស្របនឹងសភាពការណ៍ជាតិចិនដោយជោគជ័យ និងទទួលបានសមិទ្ធផលផ្នែកសិទ្ធិមនុស្សដ៏គួរឱ្យកត់សម្គាល់ ។ ប្រទេសចិនបានចូលរួមយ៉ាងសកម្មនូវយន្តការការងារសិទ្ធិមនុស្សពហុភាគី ដូចជាក្រុមប្រឹក្សាសិទ្ធិមនុស្សជាដើម ដើម្បីរួមចំណែកជាពុទ្ធិចិននិងផែនការចិនសម្រាប់អភិបាលកិច្ចសិទ្ធិមនុស្សជាសកល ៕