មហាសន្និបាតប្រចាំឆ្នាំ២០២១នៃសភាប្រឹក្សានយោបាយប្រជាជនទូទាំងប្រទេសចិនបានបើកធ្វើនៅរសៀលថ្ងៃទី ៤ ខែមីនានៅក្រុងប៉េកាំង ថ្នាក់ដឹកនាំបក្សនិងរដ្ឋចិន មានលោកប្រធានរដ្ឋស៊ីជីនភីងជាដើមបានអញ្ជើញចូលរួមក្នុងកិច្ចប្រជុំ ។
លោកWangYang ប្រធានសភាប្រឹក្សានយោបាយប្រជាជនទូទាំងប្រទេសចិនបានតំណាងឱ្យគណៈកម្មាធិការអចិន្ត្រៃយ៍នៃសភាប្រឹក្សានយោបាយប្រជាជនទូទាំងប្រទេសធ្វើរបាយការណ៍ការងារជូនអង្គប្រជុំ ដោយរំលឹកឡើងវិញពីការងារនៃសភាប្រឹក្សានយោបាយប្រជាជនទូទាំងប្រទេសចិននៅឆ្នាំ២០២០ និងដាក់ចេញទិសដៅការងារនៅឆ្នាំ២០២១ ។
មហាសន្និបាតលើកនេះមានរយៈពេល ៧ ថ្ងៃ ដែលមានការចូលរួមពីសមាជិកនៃសភាប្រឹក្សានយោបាយប្រជាជនទូទាំងប្រទេសចិនចំនួនជាង ២១០០ រូបដែលមកពីគ្រប់គណៈបក្ស អង្គភាព ជនជាតិនិងមជ្ឈដ្ឋាននានានៃប្រទេសចិន ។ អង្គប្រជុំនឹងពិនិត្យពិភាក្សាចំពោះរបាយការណ៍ការងាររបស់គណៈកម្មាធិការអចិន្ត្រៃយ៍នៃសភាប្រឹក្សានយោបាយប្រជាជនទូទាំងប្រទេស និងរបាយការណ៍ស្តីពីសភាពការណ៍នៃសេចក្តីស្នើច្បាប់ ក៏ដូចជានឹងចូលរួមមហាសន្និបាតប្រចាំឆ្នាំ២០២១នៃសភាតំណាងប្រជាជនទូទាំងប្រទសចិន ដើម្បីស្តាប់និងពិគ្រោះពិភាក្សាលើរបាយការណ៍ការងាររដ្ឋាភិបាលចិន ផែនការអភិវឌ្ឍន៍ ៥ ឆ្នាំទី ១៤ នៃសេដ្ឋកិច្ចជាតិនិងសង្គម ព្រមនិងសេចក្តីព្រាងច្បាប់ស្តីពីគោលដៅចក្ខុវិស័យរយៈពេលវែងឆ្នាំ២០៣៥ ។