កាលពីថ្ងៃទី៨ខែមីនា វេទិកាប្រព័ន្ធសារព័ត៌មាននិងធនាគារគំនិតស្តីពីការអភិវឌ្ឍសេដ្ឋកិច្ចសកលនៃមហាសន្និបាតនៃសភាទាំងពីររបស់ចិនឆ្នាំ២០២១ដែលរៀបចំដោយរដ្ឋបាលបោះពុម្ពផ្សាយជាភាសាបរទេសនៃប្រទេសចិនបានបើកធ្វើនៅក្រុងប៉េកាំង ។ អតីតអ្នកនយោបាយសំខាន់ៗ អ្នកជំនាញនិងបញ្ញវ័ន្តល្បីឈ្មោះជិត២០រូបដែលមកពីប្រទេសចិន បារាំងនិងរុស្ស៊ីជាដើមបានផ្លាស់ប្តូរមតិយោបល់យ៉ាងស៊ីជម្រៅអំពីបញ្ហាប្រឈមជាសកល ការបង្កើនកិច្ចសហប្រតិបត្តិការអន្តរជាតិនិងការរំពឹងទុកចំពោះប្រទេសចិនក្នុងយុគសម័យបន្ទាប់ពីបញ្ចប់ជំងឺកូវីដ១៩ជាដើមតាមរបៀបអនឡាញនិងនៅកន្លែងផ្ទាល់ ។
លោក Du Zhanyuan ប្រធានរដ្ឋបាលបោះពុម្ពផ្សាយជាភាសាបរទេសនៃប្រទេសចិនបានថ្លែងថា ចាប់តាំងពីផ្ទុះជំងឺកូវីដ១៩មក សេដ្ឋកិច្ចពិភពលោកបានរងផលប៉ះពាល់យ៉ាងធ្ងន់ធ្ងរដែលតម្រូវឱ្យប្រទេសនានាជួយគ្នាទៅវិញទៅមក ធ្វើកិច្ចសហប្រតិបត្តិការនិងរួមគ្នាទប់ទល់នឹងបញ្ហាប្រឈមជាសកល ។ ក្នុងយុគសម័យបន្ទាប់ពីបញ្ចប់ជំងឺកូវីដ១៩ សេដ្ឋកិច្ចប្រទេសចិនបានបង្ហាញពីភាពធន់យ៉ាងខ្លាំង ចិនមានជំនឿចិត្តលើការអភិវឌ្ឍរបស់ខ្លួន ហើយក៏រំពឹងទុកអាចចែករំលែកឱកាសនិងសមិទ្ធផលអភិវឌ្ឍន៍ជាមួយប្រទេសនានាលើពិភពលោកតាមរយៈការពិភាក្សាជាមួយគ្នានិងកសាងជាមួយគ្នាផងគ្នា ។
ភ្ញៀវកិត្តិយសដែលចូលរួមកិច្ចប្រជុំបានផ្តួចផ្តើមគំនិតថា ដើម្បីអនុវត្តដោយមានប្រសិទ្ធភាពនូវអភិបាលកិច្ចសកល ប្រទេសនានាគួរតែអនុវត្តនិងគាំពារពហុភាគីនិយម កសាងសេដ្ឋកិច្ចពិភពលោកដែលបើកទូលាយនិងប្រកបដោយបរិយាប័ន្ន សំដៅជំរុញសេដ្ឋកិច្ចសកលឱ្យងើបឡើងវិញ និងពួតដៃគ្នាទប់ទល់នឹងបញ្ហាប្រឈមជាសកល ។