ល្បឿនកំណើននៃផលិតផលក្នុងស្រុកសរុបរបស់ចិននៅឆ្នាំ២០២១ត្រូវកំណត់លើសពី៦ភាគរយ ទំហំសេដ្ឋកិច្ចសរុបនិងចំណូលគិតជាមធ្យមរបស់មនុស្សម្នាក់ៗនៃប្រទេសចិននឹងកើនទ្វេដងនៅឆ្នាំ២០៣៥ ការចំណាយខាងការសិក្សាស្រាវជ្រាវជាមូលដ្ឋានថ្នាក់មជ្ឈិមកើនឡើង១០.៦ភាគរយ ប័ណ្ណបំណុលពិសេសនៃរដ្ឋបាលក្នុងតំបន់កើនឡើង៣.៦៥ទ្រីលានយាន់ប្រាក់ចិនល។ល ប្រការទាំងនេះជាពាក្យសន្យាថ្មីបំផុតដែលលោកលីខឹឈាង នាយករដ្ឋមន្ត្រីចិនបានធ្វើក្នុងរបាយការណ៍ការងាររដ្ឋាភិបាល ។
អ្នកផងទាំងពួងយកចិត្តទុកដាក់ពីអ្វី រំពឹងទុកពីអ្វី នោះមហាសន្និបាតនៃសភាទាំងពីររបស់ចិនក៏ផ្តោតសំខាន់និងពិគ្រោះពិភាក្សាពីរឿងនោះដែរ ។ មហាសន្និបាតនៃសភាទាំងពីររបស់ចិនថ្ងៃនេះគឺជាស្ថានភាពនយោបាយដែលពោរពេញទៅដោយភាពរស់រវើកមួយបែប ។ ឆ្លងតាមរយៈមហាសន្និបាតនៃសភាទាំងពីរ យើងអាចមើលឃើញថា រដ្ឋាភិបាលមជ្ឈិមចិនបានដឹងពីសេចក្តីត្រូវការរបស់ប្រជាជនចំនួន១ពាន់៤រយលាននាក់នៅគ្រប់ទីកន្លែង ។ ឆ្លងតាមរយៈមហាសន្និបាតនៃសភាទាំងពីរ យើងអាចចាប់អារម្មណ៍ថា ប្រព័ន្ធរបបនយោបាយដែលបង្កើតឡើងពីដីធ្លីសង្គមចិនពោរពេញទៅដោយភាពរស់រវើកនិងភាពផុលផុស ។
ក៏ដូចគ្នានឹងឆ្នាំមុនៗដែរ “មហាសន្និបាតដ៏ឱឡារិកដែលបើកធ្វើនៅរដូវផ្ការីក”លើកនេះត្រូវគេយកចិត្តទុកដាក់យ៉ាងខ្លាំង ។ ប្រព័ន្ធសារព័ត៌មានសកលនាំគ្នាផ្តោតសំខាន់ទៅលើមហាសន្និបាតនៃសភាទាំងពីររបស់ចិន ។ មានប្រព័ន្ធសារព័ត៌មានប៉ែកខាងលិចបង្ហាញថា តាមពិតទៅ “ចិនអាចរៀបចំធ្វើមហាសន្និបាតនៃសភាទាំងពីរ ក៏ជាជ័យជំនះម្យ៉ាងហើយ ។”អាចនិយាយដោយមិនអួតអាងថា មហាសន្និបាតនៃសភាទាំងពីររបស់ចិនបានទាក់ទាញក្រសែចក្ខុរបស់ទូទាំងពិភពលោក អ្នកផងទាំងពួងសុទ្ធតែចង់ឃើញពេលអនាគតពីក្នុងករណីនេះ ។
មហាសន្និបាតនៃសភាទាំងពីររបស់ចិនជាការបង្ហាញពីពិធីនៃប្រព័ន្ធរបបនយោបាយសង្គមនិយមប្រកបដោយលក្ខណៈពិសេសចិន ជាការដំណើរការជាក់ស្តែងមួយនៃ “ប្រជាធិបតេយ្យបែបចិន” ។ តម្រូវការនិងសំណូមពរនៃក្រុមមនុស្សនានាក្នុងសង្គមព្រមនិងបញ្ហាប្រឈមក្នុងការអភិវឌ្ឍជាក់ស្តែងត្រូវបានបង្ហាញដោយចំហនិងមានរបៀបរៀបរយលើវេទិកានេះ ។ ប្រមូលផ្តុំគំនិតឯកភាពរួមក្នុងកិច្ចសន្ទនាគ្នា ស្វែងរកចម្លើយក្នុងការពិភាក្សាជាមួយគ្នា ដោយពឹងផ្អែកលើប្រព័ន្ធរបបដែលប្រកបដោយលក្ខណៈពិសេសរបស់ចិននេះ បានធានាប្រជាជនអាចចូលរួមអភិបាលកិច្ចជាតិនិងសង្គមយ៉ាងទូលំទូលាយ ។
ឆ្លងតាមរយៈមហាសន្និបាតនៃសភាទាំងពីររបស់ចិនឆ្នាំនេះ តើធ្វើយ៉ាងណាទើបអាចកាត់បន្ថយបន្ទុករបស់កូនទោលក្នុងការថែទាំមនុស្សចាស់ដែលកើតជំងឺ តើធ្វើយ៉ាងណាទើបអាចធានាសិទ្ធិនិងផលប្រយោជន៍ពលកម្មរបស់ក្រុមពលករដែលធ្វើការងារដោយសេរី និងតើត្រូវកែសម្រួលគោលនយោបាយអំពីពន្ធលើប្រាក់ចំណូលបុគ្គលដើម្បីជំរុញការប្រើប្រាស់ថែមមួយកម្រិតទៀតតាមរបៀបណា ។ ប៉ុន្មានឆ្នាំកន្លងទៅនេះ បញ្ហាយុគសម័យជាច្រើនដែលពាក់ព័ន្ធនឹងផែនការជាតិនិងជីវភាពរស់នៅរបស់ប្រជាជនត្រូវបានដោះស្រាយនៅទីចុងបំផុតបន្ទាប់ពីការពិគ្រោះពិភាក្សារបស់មហាសន្និបាតនៃសភាទាំងពីរដែលបានក្លាយជាខ្លឹមសារនៃការអភិវឌ្ឍសង្គម ។
ប្រជាធិបតេយ្យមិនមែនជាវត្ថុតែងលម្អនោះទេ តែត្រូវប្រើប្រាស់ក្នុងការដោះស្រាយបញ្ហារបស់ប្រជាជន ។ ប៉ុន្មានឆ្នាំកន្លងទៅនេះ និន្នាការយ៉ាងច្បាស់លាស់នៃមហាសន្និបាតនៃសភាទាំងពីររបស់ចិនគឺកាន់តែយកចិត្តទុកដាក់ដល់កម្រិតបើកទូលាយនិងចូលរួម ។ “ការយកបទសម្ភាសន៍ជាមួយរដ្ឋមន្ត្រី” “ការយកបទសម្ភាសន៍ជាមួយសមាជិកសភាប្រឹក្សានយោបាយប្រជាជនទូទាំងប្រទេសចិន”និង “ការយកបទសម្ភាសន៍ជាមួយតំណាងប្រជាជននៃសភាតំណាងប្រជាជនទូទាំងប្រទេសចិន”ត្រូវបានដាក់ចេញជាបន្តបន្ទាប់ វេទិកាដូចជា “ខ្ញុំមានពាក្យសម្តីចង់ជំរាបជូននាយករដ្ឋមន្ត្រី”ជាដើមនាំឱ្យសំឡេងរបស់អ្នកប្រើប្រាស់បណ្តាញអ៊ីនធើណេតត្រូវបញ្ជូនទៅដល់មហាសន្និបាតនៃសភាទាំងពីរ ដែលជំរុញឱ្យអ្នកប្រើប្រាស់បណ្តាញអ៊ីនធើណេតចូលរួមយ៉ាងសកម្មនូវព្រឹត្តិការណ៍នយោបាយសំខាន់ៗថែមមួយកម្រិតទៀត ។
ប្រវត្តិសាស្ត្របានបញ្ជាក់រួចរាល់ហើយថា “ប្រជាធិបតេយ្យបែបចិន”គឺមានប្រសិទ្ធភាពល្អ ។ ក្នុងបរិការណ៍ថ្មី បន្តជំរុញប្រសិទ្ធភាពនៃប្រព័ន្ធរបប យើងមុខជាអាចប្រមូលផ្តុំកម្លាំងកាយចិត្តឱ្យបានកាន់តែល្អ ដើម្បីសរសេររឿងរ៉ាវប្រទេសចិនដែលពោរពេញទៅដោយក្តីសង្ឃឹមកាន់តែច្រើនឡើងៗជាមិនខាន ៕