តាមការផ្សាយដំណឹងឱ្យដឹងថា ពេលថ្មីៗកន្លងទៅនេះ លោក Antonio Guterres អគ្គលេខាធិការអង្គការសហប្រជាជាតិបានផ្ញើសារលិខិតជូនប្រទេសចិន ដើម្បីអបអរសាទរប្រទេសចិនទទួលបានជោគជ័យគ្រប់ជ្រុងជ្រោយក្នុងយុទ្ធនាការពុះពារឧបសគ្គក្នុងការលុបបំបាត់ភាពក្រីក្រ ហើយថ្លែងថា ការដែលប្រទេសចិនទទួលបានសមិទ្ធផលដ៏អស្ចារ្យបែបនេះបាននាំមកនូវក្តីសង្ឃឹមដល់សហគមន៍អន្តរជាតិ ។
ទាក់ទិននឹងរឿងនេះ លោក Zhao Lijian អ្នកនាំពាក្យក្រសួងការបរទេសចិនបានថ្លែងក្នុងសន្និសីទសារព័ត៌មានជាប្រចាំកាលពីថ្ងៃទី១០ខែមីនាថា ភាគីចិនសូមសម្តែងការកោតសរសើរចំពោះការសម្តែងអាកប្បកិរិយាវិជ្ជមានរបស់លោក Antonio Guterres អគ្គលេខាធិការអង្គការសហប្រជាជាតិ ការលុបបំបាត់ភាពក្រីក្រជាឧត្តមគតិរួមរបស់មនុស្សជាតិ ។ ចិនបានសម្រេចគោលដៅកាត់បន្ថយភាពក្រីក្រមុនពេលកំណត់១០ឆ្នាំនៃរបៀបវារៈអភិវឌ្ឍន៍ជានិរន្តរភាពឆ្នាំ២០៣០នៃអង្គការសហប្រជាជាតិ ដែលបានរួមចំណែកជាប្រវត្តិសាស្ត្រសម្រាប់ការលុបបំបាត់ចោលភាពក្រីក្រក្នុងក្របខ័ណ្ឌពិភពលោកនិងសម្រេចការអភិវឌ្ឍដោយសន្តិភាព ។
លោក Zhao Lijian បានថ្លែងបន្តថា ចិនបានផ្តួចផ្តើមគំនិតស្តីពីការរួមគ្នាកសាង “ខ្សែក្រវាត់និងផ្លូវ”ដែលនឹងជំរុញឱ្យប្រជាជន៧លាន៦សែននាក់របស់ប្រទេសពាក់ព័ន្ធចេញផុតពីភាពក្រីក្រដាច់ខាត និងប្រជាជនចំនួន៣២លាននាក់ចេញផុតពីភាពក្រីក្រកម្រិតមធ្យម ។ ភាគីចិននឹងបន្តឆ្លងតាមកិច្ចសហប្រតិបត្តិការទ្វេភាគីនិងពហុភាគីដើម្បីជួយប្រទេសកំពុងអភិវឌ្ឍន៍ដទៃទៀតលើកកម្ពស់ការកសាងសមត្ថភាព ព្រមទាំងធ្វើកិច្ចសហប្រតិបត្តិការយ៉ាងសកម្មខាងការកាត់បន្ថយភាពក្រីក្រអន្តរជាតិ ដើម្បីជំរុញដំណើរកាត់បន្ថយភាពក្រីក្រអន្តរជាតិ ។