ថ្ងៃទី៩ខែមីនា លោកស្រីOkonjo-Iwealaអគ្គនាយកអង្គការពាណិជ្ជកម្មពិភពលោកបានអំពាវនាវឱ្យពាណិជ្ជករផលិតវ៉ាក់សាំងជំងឺកូវីដ១៩ពង្រីកទ្រង់ទ្រាយផលិតកម្មនៅប្រទេសកំពុងអភិវឌ្ឍន៍ ដើម្បីទប់ទល់នឹងបញ្ហាកង្វះខាតវ៉ាក់សាំងនៅទូទាំងពិភពលោកនាពេលបច្ចុប្បន្ននេះ។
ពេលចូលរួមកិច្ចប្រជុំតាមអនឡាញស្តីពីខ្សែសង្វាក់ផ្គត់ផ្គង់វ៉ាក់សាំងជំងឺកូវី១៩និងការផលិតវ៉ាក់សាំងជំងឺកូវីដ១៩ជាសកលដែលបើធ្វើនៅក្រុងហ្សឺណែវ លោកស្រីOkonjo-Iwealaបានថ្លែងថា នាពេលបច្ចុប្បន្ន ការផ្គត់ផ្គង់វ៉ាក់សាំងជំងឺកូវីដ១៩មានកង្វះខាតច្រើន ដែលមានប្រទេសនិងតំបន់ប្រហែល១៣០កំពុងរង់ចាំទទួលវ៉ាក់សាំង ប្រការនេះមិនត្រឹមតែជារឿងមិនសមហេតុសមផលប៉ុណ្ណោះទេ ថែមទាំងនឹងអូសបន្លាយសភាពការណ៍រីករាលដាលនៃជំងឺឆ្លងនិងធ្វើឱ្យប៉ះពាល់ដល់សេដ្ឋកិច្ចសកលទៀតផង។
លោកស្រីOkonjo-Iwealaបានថ្លែងបន្តថា ដោយសារទទួលផលប្រយោជន៍ពីកម្មវិធីCovaxដែលផ្តួចផ្តើមដោយអង្គការសុខភាពពិភពលោកជាដើម ទើបប្រទេសកំពុងអភិវឌ្ឍន៍មួយចំនួនទទួលបានវ៉ាក់សាំងលើកដំបូងរួចរាល់ហើយ ប៉ុន្តែ បរិមាណផលិតនិងប្រគល់វ៉ាក់សាំងនៅតែស្ថិតក្នុងកម្រិតទាបនៅឡើយ។ លោកស្រីបានសម្គាល់ឃើញថា ការពង្រីកទំហំផលិតវ៉ាក់សាំងមានកត្តារឹតត្បិតចំនួន៣ ពោលគឺកង្វះខាតវត្ថុធាតុដើម កង្វះខាតបុគ្គលិកមានបទពិសោធន៍គ្រប់គ្រាន់និងបញ្ហាខ្សែសង្វាក់ផ្គត់ផ្គង់ដែលពាក់ព័ន្ធនឹងការដាក់កំហិតពីបម្រាមនាំចេញនៃប្រទេសមួយចំនួន ៕