រសៀលថ្ងៃទី១១ខែមីនា កិច្ចប្រជុំលើកទី៤នៃមហាសន្និបាតសភាតំណាងប្រជាជនទូទាំងប្រទេសចិននីតិកាលទី១៣បានបិទបញ្ចប់។ លោកលីខឺឈាងនាយករដ្ឋមន្រ្តីចិនបានឆ្លើយសំណួររបស់អ្នកសារព័ត៌មានចិននិងបរទេសបន្ទាប់ពីពិធីបិទបញ្ចប់មហាសន្និបាត។ លោកលីខឺឈាងបានថ្លែងថា ពេលតាក់តែងគោលនយោបាយម៉ាក្រូនៃប្រទេសចិនក្នុងឆ្នាំនេះ ប្រទេសចិននឹងបន្តប្រកាន់ខ្ជាប់គោលនយោបាយស្តីពីការតម្កល់ទុកការផ្តល់ឱកាសការងារជាអាទិភាពតទៅទៀត។
លោកលីខឺឈាងបានគូសបញ្ជាក់ថា ឱកាសការងារជាមូលដ្ឋានគ្រឹះនៃជីវភាពរស់នៅរបស់ប្រជាជន ហើយក៏ជាមូលដ្ឋានគ្រឹះនៃការអភិវឌ្ឍផងដែរដែលអាចជំរុញដល់ការប្រើប្រាស់និងជំរុញដល់សេដ្ឋកិច្ច។ នៅឆ្នាំ២០២០ ប្រទេសចិនបានសម្រេចការផ្តល់ឱកាសការងារថ្មីនៅតាមជនបទនិងទីក្រុងចំនួន១១លាន៨សែន៦ម៉ឺននាក់ ហើយក៏សម្រេចបាននូវកំណើនសេដ្ឋកិច្ចពេញមួយឆ្នាំចំនួន២,៣%ផងដែរ ចំណូលរបស់ប្រជាជនក៏បានកើនឡើងក្នុងពេលដំណាលគ្នា ប្រការទាំងនេះសុទ្ធតែល្អជាងការប៉ាន់ប្រមាណ។
លោកលីខឺឈាងបានថ្លែងបន្តថា គោលដៅស្តីពីការផ្តល់ឱកាសការងារថ្មីនៅតាមជនបទនិងទីក្រុងដែលប្រទេសចិនបានកំណត់ក្នុងឆ្នាំនេះគឺលើសពី១១លាននាក់ ការមានការងារធ្វើត្រូវពឹងលើទីផ្សារជាអ្នកដើរតួនាទីសំខាន់ ហើយបន្តធានាដល់ការផ្តល់ឱកាសការងារតាមរយៈការធានាដល់តួអង្គសំខាន់ៗនៃទីផ្សារ ៕