រសៀលថ្ងៃទី១១ខែមីនា កិច្ចប្រជុំលើកទី៤នៃមហាសន្និបាតសភាតំណាងប្រជាជនទូទាំងប្រទេសចិននីតិកាលទី១៣បានបិទបញ្ចប់នៅក្រុងប៉េកាំង។ ឆ្លងតាមរយៈការបោះឆ្នោត ស្ថាប័នសិទ្ធិអំណាចកំពូលរបស់ប្រទេសចិនបានអនុម័តលើសេចក្តីសម្រេចចិត្តស្តីពីការធ្វើឱ្យប្រព័ន្ធបោះឆ្នោតនៃតំបន់រដ្ឋបាលពិសេសហុងកុងមានសុក្រឹតភាព។
ប្រព័ន្ធបោះឆ្នោតដែលតំបន់រដ្ឋបាលពិសេសហុងកុងបានអនុវត្តបច្ចុប្បន្នបូករួមទាំងនីតិវិធិជ្រើសតាំងប្រធានរដ្ឋបាលនិងបង្កើតក្រុមប្រឹក្សានីតិប្បញ្ញតិ្តដែលជាចំណែកដ៏សំខាន់របស់ប្រព័ន្ធនយោបាយនៃតំបន់រដ្ឋបាលពិសេសហុងកុង។សេចក្តីសម្រេចចិត្តបានអនុវត្តនិងបង្ហាញដោយគ្រប់ជ្រុងជ្រោយនូវគោលការណ៍ស្តីពី”អ្នកស្នេហាជាតិគ្រប់គ្រងហុងកុង”តាមរយៈប្រព័ន្ធរបបនិងយន្តការ ក្នុងន័យធានាឱ្យសិទ្ធិគ្រប់គ្រងត្រូវស្ថិតនៅក្នុងដៃរបស់កម្លាំងស្នេហាជាតិនិងស្នេហាហុងកុង ក៏ដូចជាធានាដល់ចីរភាព វិបុលភាពនិងសិ្ថរភាពយូរអង្វែងរបស់ហុងកុងផងដែរ។
ទាក់ទិននឹងការធ្វើឱ្យប្រព័ន្ធបោះឆ្នោតនៃតំបន់រដ្ឋបាលពិសេសហុងកុងមានសុក្រឹតភាព អាណិកជនចិននិងជនជាតិចិនសញ្ជាតិបរទេសនៅឯនាយសមុទ្របានបង្ហាញការគាំទ្រយ៉ាងមុតមាំចំពោះគោលនយោបាយ"អ្នកស្នេហាជាតិគ្រប់គ្រងហុងកុង” ដោយលើកឡើងថា នេះគឺជាទង្វើដ៏ចាំបាច់សម្រាប់បញ្ចប់ភាពវឹកវរខាងនយោបាយនៅហុងកុងនិងគាំពារអធិបតេយ្យភាពជាតិចិន។
លោកWangHaijunប្រធានអគ្គសមាគមជនជាតិចិនសញ្ជាតិបរទេសនៅកូរ៉េខាងត្បូងបានថ្លែងថា គ្មានប្រទេសដែលមានអធិបតេយ្យភាពណាមួយអាចអនុញ្ញាតឱ្យអ្នកមិនស្នេហាជាតិចូលរួមការកាន់អំណាចនោះទេ បុរេលក្ខខណ្ឌនៃ"ប្រព័ន្ធគ្រប់គ្រងពីរ”ចាំបាច់ត្រូវតែជា"ប្រទេសមួយ” ការស្នេហាជាតិព្រមទាំងគាំពារអធិបតេយ្យភាពនិងបូរាណភាពទឹកដីរបស់ប្រទេសជាតិគឺជាសំណូមពរមូលដ្ឋានបំផុតចំពោះអ្នកកាន់អំណាចគ្រប់រូប។
លោកLiBoboប្រធានប្រតិបត្តិនៃសមាគមជំរុញការផ្លាស់ប្តូររវាងមីយ៉ាន់ម៉ានិងចិនបានថ្លែងថា មានតែឱ្យអ្នកស្នេហាជាតិគ្រប់គ្រងហុងកុងនោះទេ ទើបអាចធានាដល់អធិបតេយ្យភាព សន្តិសុខនិងផលប្រយោជន៍របស់ប្រទេសជាតិ ទើបអាចធានាឱ្យគោលនយោបាយ”ប្រទេសមួយប្រព័ន្ធគ្រប់គ្រងពីរ”ដើរទៅមុខកាន់តែរឹងមាំនិងកាន់តែវែងឆ្ងាយ៕