តាមការផ្សាយដំណឹងនៃប្រព័ន្ធសារព័ត៌មានកូរ៉េខាងត្បូងបានឱ្យដឹងថា ព្យុះធូលីដែលមានប្រភពពីប្រទេសចិនបានវាយប្រហារកូរ៉េខាងត្បូង ។ ទាក់ទិននឹងរឿងនេះ លោក Zhao Lijian អ្នកនាំពាក្យក្រសួងការបរទេសចិនបានថ្លែងកាលពីថ្ងៃទី ១៥ ខែ មីនា ថា បញ្ហាបំពុលបរិស្ថាននិងខ្យល់អាកាសគ្មានចែកព្រំដែនទេ ពេលធ្វើសន្និដ្ឋានចំពោះប្រភពនៃព្យុះធូលីត្រូវផ្អែកលើការស្ទង់ពិនិត្យតាមវិទ្យាសាស្ត្រនិងការវិភាគចម្រុះជាមុនសិន ។
លោក Zhao Lijian បានថ្លែងទៀតថា បើយោងតាមការវិភាគរបស់ភ្នាក់ងារស្ទង់ពិនិត្យនៃប្រទេសចិន ធាតុអាកាសដែលមានព្យុះធូលីនេះគឺមកពីក្រៅដែនប្រទេសចិន ។ ប្រទេសចិនគ្រាន់តែជាទីកន្លែងមួយដែលព្យុះធូលីឆ្លងកាត់តែប៉ុណ្ណោះ ។ ថ្មីៗកន្លងទៅនេះ អាជ្ញាធរម៉ុងហ្គោលីបានប្រកាសដំណឹងពាក់ព័ន្ធអំពីគ្រោះថ្នាក់ដែលបង្កឡើងដោយព្យុះធូលី សាធារណៈមតិនៃប្រទេសចិនមិនបានចោទប្រកាន់ចំពោះម៉ុងហ្គោលីថា ប្រហែលជាប្រភពដើមនៃព្យុះធូលីនោះទេ ។
លោក Zhao Lijian បានគូសបញ្ជាក់ទៀតថា ប្រទេសចិនយកចិត្តទុកដាក់ខ្ពស់ចំពោះការគ្រប់គ្រងខ្សាច់ ហើយទទួលបានប្រសិទ្ធភាពយ៉ាងលេចធ្លោ នេះក៏បានរួមចំណែកយ៉ាងខ្លាំងសម្រាប់ការធ្វើឱ្យប្រសើរឡើងនូវគុណភាពខ្យល់អាកាសនៅក្នុងតំបន់ផងដែរ ។ ព្យុះធូលីលើកនេះបានបង្ហាញថា យើងមានការងារជាច្រើនទៀតដែលត្រូវធ្វើលើកិច្ចសហប្រតិបត្តិការក្នុងវិស័យអភិបាលកិច្ចបរិស្ថានក្នុងតំបន់របស់យើង ។ ភាគីចិនរីករាយរួមសហការជាមួយប្រទេសជិតខាងនិងសហគមន៍អន្តរជាតិ ដើម្បីរួមចំណែកយ៉ាងសកម្មក្នុងការកសាងពិភពលោកដ៏ស្រស់ស្អាត ៕