លោក ហារីស ប្រធានសេដ្ឋវិទូនៃអង្គការសហប្រជាជាតិបានថ្លែងនៅពេលផ្តល់បទសម្ភាសន៍ជាលាយលក្ខណ៍អក្សរជាមួយអ្នកយកព័ត៌មានចិនកាលពីពេលថ្មីៗកន្លងទៅនេះថា៖បទពិសោធន៍របស់ប្រទេសចិនដូចជា៖ការចាប់ផ្តើមកាត់បន្ថយភាពក្រីក្រតាំងតែពីដំបូង ការខិតខំប្រឹងប្រែងជាប្រចាំ ការប្រើប្រាស់បច្ចកទេសឌីជីថលូបនីយកម្មយ៉ាងល្អប្រសើរនិងការជំរុញយ៉ាងខ្លាំងនូវការអភិវឌ្ឍសេដ្ឋកិច្ចជនបទដែលជាទីបណ្តុំនៃប្រជាជនក្រីក្រគឺសុទ្ធតែគួរឱ្យយើងយកជាគំរូនិងរៀនសូត្រតាម។
លោកបានយល់ឃើញថា ការលុបបំបាត់ភាពក្រីក្ររបស់ប្រទេសចិនគឺជាសមិទ្ធផលដ៏អស្ចារ្យតែមួយគត់និងគួរជាទីលើកទឹកចិត្តក្នុងប្រវត្តិសាស្ត្រមនុស្សជាតិ។កិច្ចខិតខំប្រឹងប្រែងក្នុងការកាត់បន្ថយភាពក្រីក្ររបស់ប្រទេសចិនបានចាប់ផ្តើមជាយូរមកហើយពោលគឺមុនការដាក់ចេញគោលដៅអភិវឌ្ឍន៍សហស្សវត្សរបស់អង្គការសហប្រជាជាតិទៅទៀត។ ទោះបីជាលក្ខខណ្ឌពេលនោះពិបាកខ្លាំងក៏ដោយ ប៉ុន្តែ"ក៏មិនបានរារាំងដល់ការខិតខំរបស់ប្រជាជនចិនដែរ" ។
លោកបន្តថា ការពង្រឹងសមត្ថភាពបង្ការកុំឱ្យជនក្រីក្រធ្លាក់ចូលក្នុងភាពក្រីក្រវិញដោយសារវិបត្ដិនានាគឺជាបទពិសោធន៍មួយទៀតរបស់ប្រទេសចិនដែលគួរឱ្យបណ្តាប្រទេសនានារៀនសូត្រតាមផងដែរ។