មុនពេលជនជាតិអាមេរិកទាំងអស់សុទ្ធតែទទួលការចាក់វ៉ាក់សាំង សហរដ្ឋអាមេរិកនឹងមិនផ្តល់វ៉ាក់សាំងទៅឱ្យប្រទេសណាមួយនោះទេ។ទាក់ទិននឹងបញ្ហាវ៉ាក់សាំងជំងឺកូវីដ ១៩ ការបង្ហាញអាកប្បកិរិយារបស់សេតវិមានអាមេរិកបានបកស្រាយពីអ្វីដែលជា"វ៉ាក់សាំងជាតិនិយម"សុទ្ធសាធ។ក្នុងកាលៈទេសៈគន្លឹះដែលពិភពលោកទាំងមូលបាននិងកំពុងពួតដៃគ្នាប្រយុទ្ធប្រឆាំងនឹងការរីករាលដាលនៃជំងឺឆ្លង ការចែកចាយវ៉ាក់សាំងជំងឺកូវីដ ១៩ ដោយអយុត្តិធម៌និងមិនសមហេតុផលបែបនេះបានបណ្តាលឱ្យការប្រយុទ្ធប្រឆាំងនឹងជំងឺឆ្លងនៅទូទាំងពិភពលោកស្ថិតនៅក្រោមការដឹកនាំសំខាន់នៃ"ច្បាប់ព្រៃ"។
យោងតាមរបាយការណ៍បានបង្ហាញថា សហរដ្ឋអាមេរិក សហភាពអឺរ៉ុប អង់គ្លេស អូស្ត្រាលី កាណាដានិងជប៉ុនបានទទួលវ៉ាក់សាំងសរុបជាង ៣ ប៊ីនលានដូស យ៉ាងណាមិញ ប្រសិនបើគិតតាមការចាក់វ៉ាក់សំងពីរដូសក្នុងមនុស្សម្នាក់ៗ នោះ ប្រទេសដូចពោលខាងលើ គ្រាន់តែត្រូវការវ៉ាក់សាំង ២.០៦ ប៊ីនលានដូស ហើយនៅតែមានវ៉ាក់សាំងចំនួនជិត ១ ប៊ីនលានដូសបានលើសពីតម្រូវការ។ប៉ុន្តែព្រមពេលជាមួយគ្នានេះ នៅទូទាំងពិភពលោក នៅតែមានប្រទេសចំនួន ជាង ១៣០ មិនទាន់ទទួលបានវ៉ាក់សាំងជំងឺកូវីដ ១៩ នៅឡើយដែលនឹងជះឥទ្ធិពលអវិជ្ជមានយ៉ាងធ្ងន់ធ្ងរដល់ការប្រយុទ្ធប្រឆាំងនឹងជំងឺឆ្លងនៅទូទាំងពិភពលោក។
ក្នុងមួយរយៈពេលកន្លងទៅនេះ វ៉ាក់សាំងជំងឺកូវីដ ១៩ របស់ ក្រុមហ៊ុន AstraZeneca នៃអង់គ្លេសបានជួបប្រទះបញ្ហាធ្ងន់ធ្ងរ ដូច្នេះ ព័ត៌មានអវិជ្ជមានអំពីវ៉ាក់សាំងនេះត្រូវបានផ្សព្វផ្សាយក្នុងបណ្តាប្រទេសអឺរ៉ុប ហើយបន្ទាប់មក ប្រទេសកាន់តែច្រើនឡើងៗបានផ្អាកការចាក់វ៉ាក់សាំងជំងឺកូវីដ ១៩ ដែលផលិតដោយក្រុមហ៊ុន AstraZeneca ។សហរដ្ឋអាមេរិកមិនទាន់ផ្តល់សិទ្ធិអំណាចឱ្យប្រើប្រាស់វ៉ាក់សាំង AstraZeneca នោះទេ ប៉ុន្តែបែរជាស្តុកទុកវ៉ាក់សាំងរាប់សិបលានដូសក្នុងរោងចក្ររបស់ប្រទេសខ្លួន។ទ្វីបអឺរ៉ុបប្រឈមនឹងបញ្ហាកង្វះខាតវ៉ាក់សាំងយ៉ាងធ្ងន់ធ្ងរ ប៉ុន្តែសហរដ្ឋអាមេរិកឱបដៃឈរមើលនិងគ្មានប្រតិកម្មទាល់តែសោះ។នេះស្មើនឹងប្រាប់ដល់សហភាពអឺរ៉ុបថា ទោះបីជាពួកយើងជាសម្ព័ន្ធមិត្តក៏ដោយ ក៏ប៉ុន្តែជនជាតិអាមេរិកយើងកាន់តែសំខាន់ជាង។តើលោកត្រាំមិនបានបង្រៀនអ្នកទាំងអស់គ្នាអំពីគោលការណ៍ស្តីពី"អាមេរិកជាអាទិភាព"តាំងពីយូរយារណាស់មកហើយទេឬ?!
តែសំណាងដែរ ពិភពលោកនៅមានប្រទេសចិន។បន្ទាប់ពីវ៉ាក់សាំងចិនត្រូវទទួលស្គាល់យ៉ាងទូលំទូលាយព្រមទាំងត្រូវបញ្ជាក់ពីប្រសិទ្ធិភាពយ៉ាងខ្លាំងពីសំណាក់ប្រទេសមួយចំនួន បណ្តាប្រទេសកំពុងអភិវឌ្ឍន៍និងប្រទេសអឺរ៉ុបមួយចំនួននាំគ្នាបង្វែងទៅទិញវ៉ាក់សាំងចិន។គិតរហូតដល់បច្ចុប្បន្ននេះ ប្រទេសចិនបាននិងកំពុងផ្តល់ជំនួយឥតសំណងវ៉ាក់សាំងជំងឺកូវីដ ១៩ ដល់ប្រទេសកំពុងអភិវឌ្ឍន៍ចំនួន ៦៩ ដែលមានតម្រូវការជាបន្ទាន់។ព្រមជាមួយគ្នានេះ ក៏បាននាំចេញវ៉ាក់សាំងទៅកាន់ប្រទេសចំនួន ៤៣ ផងដែរ។ប្រទេសចិនបាននិងកំពុងអនុវត្តពាក្យសន្យាយ៉ាងម៉ឺងម៉ាត់អំពី"វ៉ាក់សាំងរបស់ប្រជាជន"។លើសពីនេះទៅទៀត ប្រទេសចិនក៏ពង្រីកយ៉ាងសកម្មនូវឧត្តមភាពនៃខ្សែសង្វាក់ឧស្សាហកម្មរបស់ខ្លួនដើម្បីគាំទ្រនិងជួយប្រទេសដទៃទៀតកែច្នៃនិងផលិតផលិតផលវ៉ាក់សាំងក្នុងប្រទេសចិនឬក្នុងតំបន់ ក្នុងន័យជំរុញផលិតភាពជាសកល។
ពីអាមេរិកឡាទីនដល់ទ្វីបអាហ្រ្វិក ពីអាស៊ីអាគ្នេយ៍ដល់អឺរ៉ុប វ៉ាក់សាំងចិនត្រូវដឹកជញ្ជូនទៅកាន់ប្រទេសណា អ្នកនយោបាយសំខាន់ៗនៃប្រទេសនោះ ក៏បានអញ្ជើញទៅព្រលានយន្ដហោះដើម្បីស្វាគមន៍ដោយផ្ទាល់និងបានចាក់វ៉ាក់សាំងចិនមុនគេបង្អស់ វ៉ាក់សាំងចិនទទួលបានជឿទុកចិត្តយ៉ាងខ្លាំងពីសំណាក់ប្រជាជននៃបណ្តាប្រទេសនានា។
យ៉ាងណាមិញ អ្នកនយោបាយនិងពួកប្រឆាំងប្រទេសចិនខ្លះនៃអាមេរិកមិនអាចអត់ទ្របានដែលមើលឃើញវ៉ាក់សាំងចិនមានប្រជាប្រិយភាពយ៉ាងខ្លាំង។ពួកគេមិនត្រឹមតែមិនថ្កោលទោសទង្វើដែលគិតតែផលប្រយោជន៍ផ្ទាល់ខ្លួនរបស់រដ្ឋាភិបាលអាមេរិកប៉ុណ្ណោះទេ ថែមទាំងក៏បានឃោសនាបំប៉ោងយ៉ាងគឃ្លើនលើប្រព័ន្ធសារព័ត៌មានដោយនិយាយមួលបង្កាច់សកម្មភាពមានទំនួលខុសត្រូវរបស់ចិនថា ជាការអនុវត្ត"ការទូតខាងវ៉ាក់សាំង"ដើម្បីឆក់យកផលប្រយោជន៍នយោបាយ។តក្កវិទ្យារបស់ពួកគេ គឺ៖ ខ្ញុំមិនចែករំលែកវ៉ាក់សាំង ប្រទេសចិនម៉េចចែករំលែក?!ខ្ញុំមិនទៅជួយគេ អ្នកផ្សេងកុំធ្វើជាមនុស្សល្អដែរ។
មានតែអនុវត្ត"ពហុភាគីនិយម"ប៉ុណ្ណោះ ទើបអាចមានអំណោយផលដល់ការធានាសិទ្ធិនិងផលប្រយោជន៍ទទួលបានវ៉ាក់សាំងដោយស្មើគ្នារបស់ប្រទេសកំពុងអភិវឌ្ឍន៍និងកាត់បន្ថយការខាតបង់ខាងអាយុជីវិតនិងសេដ្ឋកិច្ចដែលបណ្តាលមកពីការរីករាលដាលនៃជំងឺឆ្លង។ប្រការនេះមិនត្រឹមតែជាជម្រើសខាងសីលធម៌របស់មនុស្សជាតិប៉ុណ្ណោះទេ ថែមទាំងក៏ជាជម្រើសប្រកបដោយវិចារណញ្ញាណជាសកលផងដែរ៕