កាលពីថ្ងៃទី ២១ ខែមីនា ក្រុមការងារនៃយន្តការបង្ការនិងគ្រប់គ្រងរួមនៃក្រុមប្រឹក្សាកិច្ចការរដ្ឋចិនបានបើកធ្វើសន្និសីទសារព័ត៌មាន ដោយធ្វើបទបង្ហាញពីស្ថានភាពពាក់ព័ន្ធនឹងការចាក់វ៉ាក់សាំងប្រឆាំងនឹងកូវីដ ១៩ របស់ប្រទេសចិន ។ ថ្លែងក្នុងសន្និសីទសារព័ត៌មានលោកMi Feng អ្នកនាំពាក្យនៃគណៈកម្មាធិការជាតិសុខាភិបាលចិនបានឱ្យដឹងថា បច្ចុប្បន្ន ការងារចាក់វ៉ាក់សាំងប្រឆាំងនឹងកូវីដ ១៩ ជូនក្រុមមនុស្សសំខាន់បានប្រព្រឹត្តិទៅយ៉ាងរលូន គិតរហូតមកទល់ម៉ោង ២៤ ថ្ងៃទី ២០ ខែមីនា បានទទួលសេចក្តីរាយការណ៍អំពីការចាក់វ៉ាក់សាំងសរុប ៧៤ លាន ៩ សែន ៥ ម៉ឺន ៦ ពាន់ដូសនៅទូទាំងប្រទេសចិន។
លោកHe Qinghua មន្រ្តីនាយកដ្ឋានគ្រប់គ្រងជំងឺឆ្លងនៃគណៈកម្មាធិការជាតិសុខាភិបាលចិនបានលើកឡើងថា ទោះបីជាជំងឺឆ្លងនៅប្រទេសចិនទទួលបានការគ្រប់គ្រងប្រកបដោយប្រសិទ្ធភាពហើយក៏ពិតមែន ប៉ុន្តែជំងឺឆ្លងនៅតែរីករាលដាលក្នុងក្របខ័ណ្ឌទូទាំងពិភពលោកដដែល ដូចនេះការចាក់វ៉ាក់សាំងគឺជាវិធីដែលមានប្រសិទ្ធភាពបំផុតសម្រាប់បង្ការនិងគ្រប់គ្រងជំងឺកូវីដ ១៩ ។ លោកបានអំពាវនាវឱ្យប្រជាពលរដ្ឋចូលរួមការចាក់វ៉ាក់សាំងប្រឆាំងនឹងកូវីដ ១៩ យ៉ាងសកម្ម ។ លោកបានថ្លែងទៀតថា ជំហានក្រោយនឹងបន្តជំរុញការចាក់វ៉ាក់សាំង និងពង្រីកក្របខ័ណ្ឌចាក់ជូនប្រជាពលរដ្ឋទូទៅ ៕