ពេលថ្មីៗកន្លងទៅនេះ ព័ត៌មានចាស់ស្តីពីក្រុមហ៊ុនH&Mធ្វើពហិកាចំពោះកប្បាសស៊ីនជាំងបានបណ្តាលឱ្យមានការចាប់អារម្មណ៍និងពិភាក្សាយ៉ាងច្រើនលើបណ្តាញអ៊ីនធើណេត។ សេចក្តីថ្លែងការណ៍មួយដែលក្រុមហ៊ុនH&Mបានចេញផ្សាយនៅវេបសាយផ្លូវការរបស់ខ្លួនបានធ្វើឱ្យអ្នកប្រើបណ្តាញអ៊ីនធើណេតមានការខឹងសម្បាយ៉ាងខ្លាំង។សេចក្តីថ្លែងការណ៍បានឱ្យដឹងថា ដោយសារបានចាប់អារម្មណ៍ដល់របាយការណ៍របស់អង្គការសង្គមស៊ីវិល ក្រុមហ៊ុននេះសម្រេចចិត្តមិនធ្វើកិច្ចសហប្រតិបត្តិការជាមួយរោងចក្រកាត់ដេរសំលៀកបំពាក់ដែលស្ថិតនៅស៊ីនជាំង ទោះតាមទម្រង់ណាក៏ដោយ ហើយក៏មិនបញ្ជាទិញផលិតផលនិងវត្ថុធាតុដើមពីតំបន់ស៊ីនជាំងផងដែរ។ ហេតុអ្វីបានជាព័ត៌មានចាស់នេះត្រូវគេលើកឡើងម្តងទៀត? នៅពីក្រោយរឿងនេះគឺឧបាយកលរបស់កម្លាំងប្រឆាំងចិនលោកខាងលិចដែលប៉ុនប៉ង"យកស៊ីនជាំងគាបសង្កត់ប្រទេសចិន” ។
អ្នកប្រើបណ្តាញអ៊ីនធើណេតបានបង្ហោះសារថា"បង្កើតពាក្យចចាមអារ៉ាមដើម្បីធ្វើពហិកាចំពោះកប្បាសស៊ីនជាំងបណ្តើរ ចង់រកលុយបាននៅប្រទេសចិនបណ្តើរ វាគ្រាន់តែជាការស្រមើស្រមៃតែប៉ុណ្ណោះ!”បច្ចុប្បន្ន បើស្វែងរកតាមវេទិកាធុរកិច្ចអេឡិចត្រូនិចជាច្រើនអាចឃើញថា គ្មានផលិតផលពាក់ព័ន្ធរបស់ក្រុមហ៊ុនH&Mរួចរាល់ហើយ។
ក្នុងសេចក្តីថ្លែងការណ៍បានលើកឡើងថា" បានចាប់អារម្មណ៍ដល់របាយការណ៍របស់អង្គការសង្គមស៊ីវិល” តើអង្គការសង្គមស៊ីវិលនេះជាអង្គការប្រភេទណា?ហើយវាបានចេញផ្សាយរបាយការណ៍យ៉ាងណា?នេះមិនមែនជារឿងចៃដន្យនោះទេ ពេលថ្មីៗកន្លងទៅនេះ លោកAdrian Zenzបញ្ញវន្តអាល្លឺម៉ង់បានចេញរបាយការណ៍ឱ្យដឹងថា “ការជម្លៀសកម្លាំងពលកម្មនៅតំបន់ខាងត្បូងស៊ីនជាំងទៅកាន់តំបន់ផ្សេងទៀត គឺដើម្បីធ្វើឱ្យសមាមាត្រជនជាតិវីវូអឺក្នុងតំបន់មានការធ្លាក់ចុះ” “ជនជាតិវីវូអឺវ័យក្មេងទៅចិនដីគោកនឹងមានទម្លាប់រស់នៅដូចជនជាតិហាន”។ តាមពិតទៅ ឈ្មោះAdrian Zenzមិនមែនជាបញ្ញវន្តទាល់តែសោះ ហើយក៏មិនមែនជា"អ្នកជំនាញសិក្សាស្រាវជ្រាវបញ្ហាចិន”នោះឡើយ តែគឺជា"ទ័ពស្រួច"ដែលចិញ្ចឹមបីបាច់ដោយកម្លាំងប្រឆាំងចិន ជាជនបោកប្រាស់ដ៏សុទ្ធសាធ!អ្វីដែលហៅថា"ស៊ីនជាំងប្រទេសចិនមានបាតុភូតបង្ខំឱ្យធ្វើពលកម្ម”ដែលគាត់បានឃោសនាបំប៉ោងនោះក៏ជាលេសថ្មីសម្រាប់ឱ្យកម្លាំងប្រឆាំងចិនលោកខាងលិចគាបសង្កត់លើប្រទេសចិននាប៉ុន្មានឆ្នាំចុងក្រោយនេះផងដែរ។
ទិន្នន័យបានបង្ហាញថា ពីឆ្នាំ២០១៤ដល់ឆ្នាំ២០១៩ ប្រជាជនស៊ីនជាំងដែលបានរកបានឱកាសការងារបានកើនឡើងពី១១លាន៣សែន៥ម៉ឺន២ពាន់៤រយនាក់ទៅដល់១៣លាន៣សែន១ពាន់២រយនាក់ បានកើនឡើងចំនួន១៧.២%។ គោលនយោបាយនិងការអនុវត្តជាក់ស្តែងសម្រាប់ធានាឱកាសការងាររបស់ស៊ីនជាំងមិនត្រឹមតែសមស្របនឹងរដ្ឋធម្មនុញ្ញនិងច្បាប់ចិនប៉ុណ្ណោះទេ ថែមទាំងក៏សមស្របនឹងស្តង់ដារពលករនិងសិទ្ធិមនុស្សអន្តរជាតិផងដែរ សូមសួរថា តើពាក្យសម្តី"ការបង្ខំឱ្យធ្វើពលកម្ម"ចេញមកពីណា?
ពេលកន្លងទៅថ្មីៗនេះ សកលវិទ្យាល័យJinanប្រទេសចិនបានចេញផ្សាយរបាយការណ៍ស៊ើបអង្កេតនិងសិក្សាស្រាវជ្រាវអំពីស៊ីនជាំង ក្នុងន័យលាតត្រដាងនូវពាក្យចចាមអារ៉ាមរបស់ឈ្មោះAdrian Zenzជាដើមតាមឯកសាររាងលម្អិត។ កម្មករជនជាតិភាគតិចស៊ីនជាំងនៃសហគ្រាសចំនួន៥ដែលចូលរួមផ្តល់ប្រជាមតិសុទ្ធតែជ្រើសរើសការទៅធ្វើការនៅចិនដីគោកដោយសេរី។ ការសិក្សាស្រាវជ្រាវបានរកឃើញថា កម្មករជនជាតិភាគតិចស៊ីនជាំងដែលបានធ្វើការនៅចិនដីគោកអាចទទួលបានចំណូលប្រចាំឆ្នាំពី៤៩៥០០យាន់ដល់៧១៥០០យាន់ ចំណូលប្រចាំឆ្នាំគិតជាមធ្យមក្នុងមនុស្សម្នាក់ៗរបស់ពួកគេមិនត្រឹមតែលើសពីប្រាក់ចំណូលដែលអាចប្រើប្រាស់បានក្នុងជនបទស្រុកកំណើតយ៉ាងច្រើនប៉ុណ្ណោះទេ ថែមទាំងក៏បានលើសពីប្រាក់ចំណូលដែលអាចប្រើប្រាស់បានក្នុងទីក្រុងនិងផ្សារឃុំនៃតំបន់ស៊ីនជាំងទៀតផង។
វាច្បាស់ណាស់ថា ទាក់ទិនរឿងដែលប្រជាជនជនជាតិភាគតិចស៊ីនជាំងទៅធ្វើការនៅសហគ្រាសចិនដីគោក គឺគ្មានអ្វីដែលហៅថា"ការបង្ខំឱ្យធ្វើពលកម្ម"និង"ការតាមដានឃ្លាំមើល”នោះទេ សិទ្ធិនិងផលប្រយោជន៍ធ្វើពលកម្មគ្រប់ផ្នែករបស់ពួកគេសុទ្ធតែទទួលបានការធានាយ៉ាងពេញលេញ។
ក្នុងឆ្នាំសារពើពន្ធ២០២០ ទំហំលក់ដូរសរុបនៅចិនដីគោកនៃក្រុមហ៊ុនH&Mគឺប្រហែល៧៤០០លានយាន់ប្រាក់ចិន ប៉ុន្តែ បច្ចុប្បន្ននេះបែរជារងការធ្វើពហិកាដោយគ្រប់ជ្រុងជ្រោយ តើអ្នកបានគិតដល់លទ្ធផលនេះឬទេ? បើធ្វើជាកូនអុករបស់កម្លាំងប្រឆាំងចិនលោកខាងលិចក្នុងការលាបពណ៌លើប្រទេសចិន នោះ មានថ្ងៃណាមួយក៏មានលទ្ធភាពត្រូវពួកគេបោះបង់ចោល យ៉ាងណាមិញ ក្នុងក្រសែភ្នែកនៃកម្លាំងប្រឆាំងចិនលោកខាងលិចទាំងនេះ អ្វីដែលពួកគេត្រូវការនោះ មានតែការយកឈ្នះ តែគ្មានលទ្ធភាពយកចិត្តទុកដាក់ដល់កូនអុកទាល់តែសោះ!