ការចរចាអំពីបញ្ហាអាកាសធាតុរវាងចិននិងអាមេរិកដែលបានដំណើរការអស់រយៈ២ថ្ងៃបានបិទបញ្ចប់ ភាគីទាំងពីរបានចេញសេចក្តីថ្លែងការណ៍រួមស្តីពីការចរចានៅថ្ងៃទី១៨ខែមេសា។
តាមការយល់ឃើញរបស់ប្រព័ន្ធសារព័ត៌មានបរទេសឱ្យដឹងថា សេចក្តីថ្លែងការណ៍រួមបានបង្ហាញពីឆន្ទៈធ្វើកិច្ចសហប្រតិបត្តិការលើវិស័យអាកាសធាតុរវាងចិននិងអាមេរិក។ ក្នុងនាមជាប្រទេសបញ្ចេញកាបូនដ៏សំខាន់បំផុតទាំងពីរលើពិភពលោក កិច្ចសហប្រតិបត្តិការរវាងចិននិងអាមេរិកនឹងជះឥទ្ធិពលវិជ្ជមានចំពោះការកាត់បន្ថយការបញ្ចេញកាបូននៅទូទាំងពិភពលោក ។
«កាសែតញូវយ៉កថែម»បានចុះផ្សាយថា “ទោះបីជាទំនាក់ទំនងរវាងចិននិងអាមេរិកមានភាពតានតឹងក៏ដោយ ក៏ប៉ុន្តែ ប្រទេសទាំងពីរបានឯកភាពគ្នាធ្វើកិច្ចខិតខំប្រឹងប្រែងរួមលើបញ្ហាបម្រែបម្រួលអាកាសធាតុ។”នេះគឺជាគំរូនៃកិច្ចសហប្រតិបត្តិការទ្វេភាគីដែលកម្រមានណាស់។
ប្រព័ន្ធសារព័ត៌មានសំខាន់ៗនៃអាមេរិកនិងអឺរ៉ុប ក្នុងនោះបូករួមទាំង«កាសែតញូវយ៉កថែម» ទីភ្នាក់ងារសារព័ត៌មានរ៉យទ័រ ទូរទស្សន៍ស៊ីអិនអិន «កាសែតហិរញ្ញវត្ថុ»និងទីភ្នាក់ងារសារព័ត៌មានអាប៉េជាដើមសុទ្ធតែបានបង្ហាញពីទស្សនៈស្រដៀងគ្នា៕