សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញចូលរួម និងថ្លែងសុន្ទរកថា ក្នុងកិច្ចប្រជុំវេទិកាBOAO អាស៊ីប្រចាំឆ្នាំ២០២១ តាមប្រព័ន្ធវីដេអូ
នាថ្ងៃទី ២០ខែមេសា ឆ្នាំ ២០២១ ពិធីបើកវេទិកា BOAO អាស៊ីប្រចាំឆ្នាំ២០២១ បានប្រារព្ធឡើងនៅតំបន់ BOAO ខេត្តហៃណាននៃប្រទេសចិន ។ ឯកឧត្តម ស៊ី ជីនភីង ប្រធានរដ្ឋចិនបានថ្លែងសុន្ទរកថាតាមប្រព័ន្ធវីដេអូ។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ថ្នាក់ដឹកនាំបរទេស និងអ្នកតំណាងអង្គការអន្តរជាតិបានអញ្ជើញចូលរួមកិច្ចប្រជុំ និងថ្លែងសុន្ទរកថាតាមប្រព័ន្ធវីដេអូ ។
ក្នុងសុន្ទរកថាបើកវេទិកានេះ សម្តេចតេជោ ហ៊ុន សែន បានសម្តែងការអបអរសាទរចំពោះខួប ២០ ឆ្នាំនៃការបង្កើតវេទិកា BOAO អាស៊ីប្រចាំឆ្នាំ២០២១ ហើយកោតសរសើរវេទិកាបានចូលរួមចំណែកយ៉ាងសំខាន់ក្នុងការជំរុញការផ្លាស់ប្តូរ និងកិច្ចសហប្រតិបត្តិការលើវិស័យនយោបាយ សេដ្ឋកិច្ច វប្បធម៌ ការការពារបរិស្ថានជាដើមក្នុងតំបន់ និងពិភពលោក ។
សម្តេចតេជោ បានកោតសរសើរប្រទេសចិនក្នុងការរួមចំណែកដោះស្រាយបញ្ហាដែលបង្កឡើងដោយជំងឺកូវីដ១៩។ សម្តេចតេជោ បានវាយតម្លៃខ្ពស់ចំពោះការយកចិត្តទុកដាក់ និងការប្តេជ្ញាចិត្តរបស់ប្រទេសចិនក្នុងការអនុវត្ត«ផ្លូវសូត្រសុខភាព» ហើយថ្លែងអំណរគុណដល់រដ្ឋាភិបាលចិនដែលបានផ្តល់គ្រឿងបរិក្ខារវេជ្ជសាស្រ្ត និងវ៉ាក់សាំងការពារកូវីដ១៩ មកកាន់ប្រទេសកម្ពុជាយ៉ាងទាន់ពេលវេលា ដែលបានគាំទ្រប្រទេសកម្ពុជាក្នុងការគ្រប់គ្រងជំងឺកូវីដ១៩ ។ សម្តេចតេជោ បានបន្តថា ក្រោមគំនិតផ្ដួចផ្តើម «ខ្សែក្រវាត់ និងផ្លូវ» បង្កើតមក បានរួមចំណែកដល់ការជំរុញកិច្ចសហ ប្រតិបត្តិការក្នុងតំបន់ និងពិភពលោក លើហេដ្ឋារចនាសម្ព័ន្ធរឹងនិងទន់ សេដ្ឋកិច្ចពាណិជ្ជកម្ម កាលានុវត្តភាពវិនិយោគការផ្លាស់ប្ដូរវប្បធម៌ ព្រមទាំងការតភ្ជាប់រវាងប្រជាជននិងប្រជាជន។ សម្តេចតេជោគូសបញ្ជាក់ថា ខណៈពេលនៃការធ្លាក់ចុះសេដ្ឋកិច្ចសកលនេះ គំនិតផ្ដួចផ្តើម «ខ្សែក្រវាត់ និងផ្លូវ» នៅតែជាកម្លាំងចលករពង្រីកកិច្ចសហប្រតិបត្តិការក្នុងចំណោមប្រទេសនៅក្នុងតំបន់ និងពិភពលោកសម្រាប់បុព្វហេតុសន្តិភាព សន្តិសុខ វិបុលភាព និងការអភិវឌ្ឍប្រកបដោយចីរភាព។
សម្តេចតេជោ ហ៊ុន សែន បានបន្តថា រាជរដ្ឋាភិបាលកម្ពុជានឹងប្រកាន់ខ្ជាប់ ហើយគាំទ្រយ៉ាងមុតមាំនូវពហុភាគីនិយមរីករាយរួមសហការជាមួយប្រទេសចិននិងប្រទេសពាក់ព័ន្ធ ដើម្បីគាំពារប្រព័ន្ធអន្តរជាតិដែលមានអង្គការសហប្រជាជាតិជាស្នូល ។
ឆ្នាំនេះជាឆ្នាំខួបទី ២០ នៃការបង្កើតវេទិកា BOAO អាស៊ី ហើយក៏ជាឆ្នាំដែលសម្តេចតេជោ ហ៊ុន សែន បានចូលរួមវេទិកា BOAO អាស៊ី លើកទី ៤ ផងដែរ ។
អ្នកបកប្រែ៖刘蓉