តាមការផ្សាយដំណឹងនៃវេបសាយ Financial Times របស់អង់គ្លេសបានឱ្យដឹងថា ថ្ងៃទី២៩ ខែឧសភា រ៉ុក្កែតដឹកជញ្ជូន Long March-5 B2 បានត្រូវបាញ់បង្ហោះទៅកាន់លំហអវកាសនៅទីលានបង្ហោះយានអវកាស ដែលស្ថិតនៅក្រុងWen Chang ខេត្តហៃណាន ប្រទេសចិន ដោយដឹកជញ្ជូនបន្ទប់ស្នូលTian He នៃស្ថានីយអវកាសផ្ទុកមនុស្សចូលទៅកាន់គន្លងតារាវិថីដោយចំគោលដៅតាមការគ្រោងទុក ។ ស្ថានីយអវកាសនេះនឹងហោះហើរក្នុងគន្លងតារាវិថីយ៉ាងហោចណាស់ ១០ឆ្នាំ ហើយអាចផ្ទុកអវកាសយានិកចំនួន៣នាក់សម្រាប់បំពេញភារកិច្ចយូរបំផុតកន្លះឆ្នាំ ។ តាមការប៉ាន់ប្រមាណ អវកាសយានិកចិននឹងទៅកាន់ស្ថានីយអវកាសនៅ រដូវក្តៅឆ្នាំនេះ ។
តាមការផ្សាយដំណឹងនៃវេបសាយ EL PAIS របស់ប្រទេសអេស្ប៉ាញឱ្យដឹងថា ការបង្ហោះបន្ទប់ស្នូលTian He នៃស្ថានីយអវកាសរបស់ប្រទេសចិនដោយជោគជ័យ គឺមានន័យថា ផែនការអវកាសដ៏មហិមារបស់ប្រទេសចិនបានបោះជំហានថ្មីមួយទៅខាងមុខ ។ តាមផែនការ ប្រទេសចិននឹងប្រើប្រាស់ស្ថានីយអវកាសដែលកសាងដោយខ្លួនឯង ដើម្បីធ្វើតេស្តបច្ចេកទេសគន្លឹះសម្រាប់រុករកអវកាស ក៏ដូចសិក្សាស្រាវជ្រាវនិងអភិវឌ្ឍសម្ភារៈអវកាស ។ ប្រទេសចិនបានគូសបញ្ជាក់ថា ការដែលកសាងស្ថានីយអវកាសដោយខ្លួនឯង មិនមែនដើម្បីធ្វើការតតាំងជាមួយស្ថានីយអវកាសអន្តរជាតិនោះទេ ប្រទេសចិននឹងកាន់អាកប្បកិរិយាបើកទូលាយក្នុងកិច្ចសហប្រតិបតិ្តការអន្តរជាតិលើវិស័យអវកាស ។ តាមពិត ប្រទេសចិនបានធ្វើកិច្ចសហប្រតិបតិ្តការជាមួយអង្គការសហប្រជាជាតិរួចជាស្រេចហើយ ព្រមទាំងស្វាគមន៍បុគ្គលិកសិក្សាស្រាវជ្រាវបរទេសចូលទៅកាន់បរិក្ខាទាំងនេះសម្រាប់ធ្វើពិសោធន៍រួម ៕