កាលពីថ្ងៃទី ២៧ ខែឧសភា លោកវ៉ាងអ៊ី សមាជិកក្រុមប្រឹក្សាកិច្ចការរដ្ឋនិងជារដ្ឋមន្រ្តីក្រសួងការបរទេសចិនបានធ្វើកិច្ចសន្ទនាតាមទូរស័ព្ទជាមួយលោកDominic Raabរដ្ឋមន្រ្តីការបរទេសនិងអភិវឌ្ឍន៍កិច្ចការអន្តរជាតិនៃប្រទេសអង់គ្លេសតាមការណាត់។
ថ្លែងក្នុងកិច្ចជំនួប លោកវ៉ាងអ៊ីបានលើកឡើងថា ភាគីទាំងពីរគួរប្រកាន់ខ្ជាប់ស្មារតីគោរពគ្នា ធ្វើកិច្ចសន្ទនាដោយសមភាព បង្កើនការយល់ដឹងពីគ្នា លុបបំបាត់ភាពមន្ទិលសង្ស័យ បកស្រាយឱ្យច្បាស់ពីការពិត ព្រមនិងបែងចែកការខុសនិងត្រូវ ។ “ការទូតមេក្រូ”មិនអាចទទួលយកបានទេ ការធ្វើនយោបាយបក្ខពួកនិយមកាន់តែមិនសមស្របនឹងសំណូមពរនៃយុគសម័យទៅទៀត ។ ប្រទេសចិនរីករាយប្រកាន់អាកប្បកិរិយាបើកចំហដើម្បីបន្តធ្វើការផ្លាស់ប្តូរអំពីបញ្ហារំសើបជាមួយប្រទេសអង់គ្លេស ប៉ុន្តែត្រូវតែគោរពអធិបតេយ្យភាពនិងបូរណភាពទឹកដីចិន គោរពផ្លូវអភិវឌ្ឍន៍ដែលប្រជាជនបានជ្រើសរើសដោយម្ចាស់ការ និងគោរពសិទ្ធិរបស់ប្រទេសចិនដែលមិនទទួលយកការជ្រៀតជ្រែកនិងដោះស្រាយកិច្ចការផ្ទៃក្នុងរបស់ខ្លួនពីកម្លាំងខាងក្រៅ ។
ជាការឆ្លើយតប លោកDominic Raabបានថ្លែងថា ទំនាក់ទំនងរវាងប្រទេសអង់គ្លេសនិងចិនមានមូលដ្ឋានជ្រាលជ្រៅនិងរឹងមាំ ។ ទោះបីជាប្រទេសទាំងពីរមានការខ្វែងគំនិតខ្លះក្តី ប៉ុន្តែភាគីអង់គ្លេសរីករាយប្រកាន់ខ្ជាប់ស្មារតីដែលគោរពគ្នា ស្វែងរកចំណុចឯកភាពគ្នានិងរក្សាទុកចំណុចខ្វែងគំនិត បង្កើនការផ្លាស់ប្តូរនិងការប្រាស្រ័យទាក់ទងដោយមានវិចារណញ្ញាណជាមួយភាគីចិន សំដៅបង្កើនការយល់ដឹងពីគ្នាជាបន្តបន្ទាប់ ដើម្បីយកកិច្ចសហប្រតិបត្តិការមកបញ្ជាក់ពីនិយមន័យនៃទំនាក់ទំនងរវាងភាគីទាំងពីរ តែមិនមែនការខ្វែងគំនិតនោះទេ ៕