ថ្ងៃទី២៨ ខែ ឧសភា ទីភ្នាក់ងារសារព័ត៌មាន រ៉យទ័រ បានផ្សាយដំណឹងឱ្យដឹងថា បក្សសាធារណរដ្ឋក្នុងសភាជាន់ខ្ពស់អាមេរិកបានប្រើប្រាស់យន្តការជំទាស់ក្នុងសភា (filibuster) បដិសេធការបង្កើតគណៈកម្មការអន្តរបក្សសម្រាប់ធ្វើការស៊ើបអង្កេតចំពោះព្រឹតិ្តការណ៍ចលាចលដែលកើតឡើងនៅវិមានរដ្ឋសភាកាលពីថ្ងៃទី៦ ខែមករា ឆ្នាំនេះ។ បន្ទាប់ពីធ្វើការបោះឆ្នោតសម្រេចចិត្ត លោក Schumer មគ្គុទ្ទេសក៍បក្សប្រជាធិបតេយ្យក្នុងសភាជាន់ខ្ពស់អាមេរិកបានរិះគន់ថាសមាជិកបក្សសាធារណរដ្ឋបានរារាំងមិនឱ្យប្រជាជនអាមេរិកស្វែងរកការពិតជាក់ស្តែង ។
តាមពិតទៅ បក្សទាំងពីរគឺបក្សប្រជាធិបតេយ្យនិងបក្សសាធារណរដ្ឋធ្វើបដិបក្ខគ្នា វាជារឿងប្រក្រតីសម្រាប់នយោបាយអាមេរិកទៅហើយ មូលហេតុសំខាន់គឺដោយមកពីរបបនយោបាយអាមេរិកមានកង្វះខាតតាំងពីបង្កើតឡើងមកម៉្លេះ ។ លោក Fukuyama បញ្ញវន្តផ្នែកនយោបាយបានចាត់ទុកកង្វះខាតនេះជានយោបាយបដិសេធ (vetocracy)។
ការបដិបក្ខគ្នារវាងបក្សទាំងពីរបណ្តាលឱ្យកើតមានផលវិបាកដោយផ្ទាល់ គឺមិនអាចអនុម័តលើបេក្ខជនឈរឈ្មោះសម្រាប់មុខតំណែងសំខាន់ៗនិងសេចក្តីព្រាងច្បាប់សំខាន់ៗ រហូតដល់បណ្តាលឱ្យរដ្ឋាភិបាលបិទទ្វារទៀតផង ។
ដោយមកពីរបបនយោបាយអាមេរិកមានកង្វះខាត ថែមទាំងអ្នកនយោបាយអាមេរិកតែងតែលេងល្បែងនយោបាយទៀតនោះ ដូច្នេះ ការបោះឆ្នោតប្រជាធិបតេយ្យបានឃ្លាតឆ្ងាយពីធាតុពិតរបស់ខ្លួនកាន់តែឆ្ងាយទៅៗ ពោលគឺមិនអាចបង្ហាញនិងគោរពនូវប្រជាមតិ ជាងនេះទៅទៀត វាបានក្លាយជាឧបករណ៍សម្រាប់បក្សទាំងពីរដណ្តើមផលប្រយោជន៍ផ្ទាល់ខ្លួនផងដែរ ៕