“មិនថាមើលពីផ្នែកផ្គត់ផ្គង់ឬក៏ផ្នែកតម្រូវការ ទិន្នន័យសេដ្ឋកិច្ចរបស់ចិនសុទ្ធតែនឹងរក្សាការងើបឡើងវិញជាបន្តបន្ទាប់ ។”នេះជាការប៉ាន់ប្រមាណរបស់សេដ្ឋវិទូដែលបានផ្តល់បទសម្ភាសន៍ជាមួយទីភ្នាក់ងារព័ត៌មាន Bloomberg News នៅពេលថ្មីៗកន្លងទៅនេះ ។ ហើយទិន្នន័យសេដ្ឋកិច្ចជាតិនៅខែឧសភាដែលប្រកាសដោយរដ្ឋាភិបាលចិនកាលពីថ្ងៃទី១៦ខែមិថុនាក៏បានបញ្ជាក់ពីការវិនិច្ឆ័យបែបនេះផងដែរ ។
បើមើលពីផ្នែកផ្គត់ផ្គង់ កត្តាវិជ្ជមានជាច្រើននៃសេដ្ឋកិច្ចប្រទេសចិនកំពុងដើរតួនាទីរបស់ខ្លួន ។ ឧទាហរណ៍ដូចជា តម្លៃបន្ថែមនៃឧស្សាហកម្មដែលមានទំហំប្រាក់ចំណូលលើសពី២០លានយាន់ប្រាក់ចិននៅទូទាំងប្រទេសចិននៅខែឧសភាបានកើនឡើង៨.៨ភាគរយ បើធៀបនឹងរយៈពេលដូចគ្នានៃឆ្នាំ២០២០ ពោលគឺ គិតជាមធ្យមបានកើនឡើង៦.៦ភាគរយក្នុងរយៈពេលពីរឆ្នាំកន្លងទៅ ។ គួរបញ្ជាក់ថា តម្លៃបន្ថែមនៃឧស្សាហកម្មផលិតកម្មបច្ចេកទេសខ្ពស់បានកើនឡើង១៧.៥ភាគរយបើប្រៀបធៀបនឹងរយៈពេលដូចគ្នានាឆ្នាំទៅមិញ ពោលគឺ គិតជាមធ្យម បានកើនឡើង១៣.១ភាគរយក្នុងរយៈពេលពីរឆ្នាំកន្លងទៅ ។ ក្នុងនោះ ល្បឿនកំណើននៃបរិមាណផលិតផលរថយន្តដើរដោយថាមពលថ្មីនៅខែឧសភាឆ្នាំនេះបានឡើងដល់១៦៦.៣ភាគរយ ។ វាច្បាស់ណាស់ថា កំណើនយ៉ាងឆាប់រហ័សនៃឧស្សាហកម្មផលិតកម្មប្រកបដោយបច្ចេកទេសខ្ពស់របស់ចិនបាននាំមកនូវការប៉ាន់ប្រមាណដោយសុទិដ្ឋិនិយមកាន់តែច្រើនឡើងៗដល់ការងើបឡើងវិញនៃឧស្សាហកម្មផលិតកម្ម ។ រីឯឧស្សាហកម្មផលិតកម្មដែលបង្វែរទៅរកការអភិវឌ្ឍប្រកបដោយគុណភាពខ្ពស់ នឹងនាំមកនូវកម្លាំងចលករកាន់តែខ្លាំងឡើងៗដល់ការងើបឡើងវិញនៃសេដ្ឋកិច្ចប្រទេសចិនទាំងមូល ។
បើមើលពីផ្នែកតម្រូវការ ក៏មានដំណឹងល្អជាច្រើនផងដែរ ។ ក្នុងថ្ងៃឈប់សម្រាកនៃទិវាពលកម្មអន្តរជាតិថ្ងៃទី១ខែឧសភាឆ្នាំនេះ អ្នកទេសចរដែលបានធ្វើទេសចរណ៍ក្នុងប្រទេសចិនមានចំនួន២រយ៣០លាននាក់ ប្រាក់ចំណូលខាងទេសចរណ៍លើសពី១សែនលានយាន់ប្រាក់ចិន ។ ចំនួនប្រមូលនិងដឹកជញ្ជូនទំនិញរហ័សបានវាយទម្លុះ១ពាន់លាន ។ ក្រោមការជំរុញនៃតម្រូវការប្រើប្រាស់ក្នុងថ្ងៃឈប់សម្រាក សន្ទស្សរ៍សកម្មភាពពាណិជ្ជកម្មនៃការដឹកជញ្ជូនតាមផ្លូវដែក ការដឹកជញ្ជូនតាមអាកាសនិងការស្នាក់នៅជាដើមខ្ពស់ជាង៦៥ភាគរយក្នុងរយៈពេលពីរខែជាប់ៗគ្នា ហើយសន្ទស្សរ៍សកម្មភាពពាណិជ្ជកម្មនៃការលក់រាយ មុខរបរភោជនីយដ្ឋាន សកម្មភាពកម្សាន្តផ្នែកកីឡានិងវប្បធម៌ជាដើមសុទ្ធតែលើសពី៥៨ភាគរយដែលមានភាពល្អប្រសើរណាស់ ។
ដោយសារប៉ុន្មានឆ្នាំកន្លងទៅនេះ អត្រារួមចំណែកជាមធ្យមនៃការប្រើប្រាស់ចំពោះកំណើនសេដ្ឋកិច្ចប្រទេសចិនបានឡើងដល់៦០ភាគរយ ដូច្នេះ ការមានកំណើនឡើងវិញនៃទីផ្សារប្រើប្រាស់ វាមានសារសំខាន់ចំពោះការងើបឡើងវិញនៃសេដ្ឋកិច្ចប្រទេសចិន ។ ក្នុងសប្តាហ៍មុន ធនាគាតពិភពលោកបានដំឡើងការប៉ាន់ប្រមាណអំពីកំណើនសេដ្ឋកិច្ចប្រទេសចិនឆ្នាំនេះពី៧.៩ភាគរយដល់៨.៥ភាគរយ មូលហេតុសំខាន់មួយគឺការងើបឡើងវិញនៃសេដ្ឋកិច្ចបានពង្រីកពីវិស័យវិនិយោគសាធារណៈទៅដល់វិស័យប្រើប្រាស់ជាសន្សឹមៗ ។ ជាងនេះទៅទៀត ព្រមពេលជាមួយគ្នានឹងការងើបឡើងវិញដោយនឹងនរនៃសេដ្ឋកិច្ចបានធានាយ៉ាងខ្លាំងក្លាដល់ជីវភាពរស់នៅជាមូលដ្ឋាន ។
បច្ចុប្បន្ននេះ ការបង្ការនិងគ្រប់គ្រងជំងឺកូវីដ១៩សកលនិងការងើបឡើងវិញនៃសេដ្ឋកិច្ចនៅតែមានកត្តាអស្ថិរភាពនិងមិនប្រាកដប្រជានៅឡើយ ប៉ុន្តែទន្ទឹមនឹងលក្ខខណ្ឌអនុគ្រោះបានដើរតួនាទីជាបន្តបន្ទាប់ តាមការប៉ាន់ប្រមាណ សេដ្ឋកិច្ចប្រទេសចិននឹងបន្តងើបឡើងវិញដោយនឹងនរ ហើយឋានៈជា “ក្បាលម៉ាស៊ីន”នៃសេដ្ឋកិច្ចពិភពលោកក៏នឹងត្រូវពង្រឹងឥតឈប់ឈរផងដែរ ។ តាមការពិត ធនាគារពិភពលោកបានប៉ាន់ប្រមាណក្នុងរបាយការណ៍ថ្មីបំផុតថា អត្រារួមចំណែករបស់សេដ្ឋកិច្ចប្រទេសចិនចំពោះកំណើនសេដ្ឋកិច្ចពិភពលោកក្នុងឆ្នាំ២០២១នឹងលើសពី១ភាគ៤ ៕