នៅវេលាម៉ោង ៩:២២ នាទី ថ្ងៃទី ១៧ ខែមិថុនា លោក នី ហៃសៀង លោក លៀវ បូមីង និងលោក តាង ហុងប៉ បានជិះយានអវកាសផ្ទុកមនុស្ស Shenzhou-១២ ដើម្បីហោះហើរទៅកាន់ផ្នែកស្នូលនៃស្ថានីយអវកាស ។ តាមផែនការ អវកាសយានិកទាំងបីរូបនេះនឹងស្នាក់នៅលើអវកាសប្រហែល ៣ ខែ ។ តើការបាញ់បង្ហោះលើកនេះមានចំណុចអ្វីគួរឱ្យចាប់អារម្មណ៍? តើអវកាសយានិកទាំងបីរូបនេះនឹងរស់នៅលើអវកាសយ៉ាងដូចម្តេច?
លោក នី ហៃសៀង បានទទួលតំណែងជាមេបញ្ជាការក្នុងដំណើរអវកាសលើកនេះ។ ក្នុងនាមជាអវកាសយានិកដែលមានបទពិសោធន៍ខ្ពស់ លោកធ្លាប់បានចូលរួមក្នុងបេសកកម្មរបស់យានអវកាស Shenzhou-៦ និងយានអវកាសផ្ទុកមនុស្ស Shenzhou-១០ ។ លោក លៀវ បូមីង ធ្លាប់បានចូលរួមក្នុងបេសកកម្មរបស់យានអវកាស Shenzhou-៧ ។ លោក តាង ហុងប៉ ទៅកាន់អវកាសជាលើកដំបូង ។
អវកាសយានិកទាំង ៣ រូបនឹងបំពេញភារកិច្ចសំខាន់ៗចំនួន ៤ និងធ្វើសកម្មភាពនៅខាងក្រៅបន្ទប់ស្នូល ។ ក្នុងអំឡុងពេលស្ថិតនៅលើតារាវិថីរួមមាន៖ ទី១ អនុវត្តការគ្រប់គ្រងប្រចាំថ្ងៃនៃបន្ទប់ស្នូល ។ ទី២ អនុវត្តសកម្មភាពនៅខាងក្រៅបន្ទប់ស្នូល ។ ទី៣ ធ្វើពិសោធន៍ខាងវិទ្យាសាស្ត្រអវកាសនិងបច្ចេកវិទ្យា។ ទី ៤ អនុវត្តការគ្រប់គ្រងសុខភាពរបស់អវកាសយានិកដោយខ្លួនឯង ។
ដើម្បីលើកកម្ពស់"ផាសុកភាព"របស់អវកាសយានិក នៅពេលសាងសង់ស្ថានីយអវកាស អ្នករចនាបានគិតគូរពីបរិយាកាសរស់នៅដ៏សមរម្យសម្រាប់អវកាសយានិកដោយសាងសង់បន្ទប់ទំហំ ១១០ ម៉ែត្រគូប ។
ក្រៅពីនេះ ស្ថានីយអវកាសចិនបានចែកជាតំបន់រស់នៅ និងតំបន់ធ្វើការ ។ តំបន់រស់នៅមានកន្លែងគេង បន្ទប់ទឹក កន្លែងហាត់ប្រាណ ផ្ទះបាយនិងកន្លែងបរិភោគអាហារ។
លើសពីនេះ អវកាសយានិកក៏អាច“គេងដោយសេរី”ផងដែរ។ ទោះបីជាពួកគេនៅតែត្រូវ"គេងនៅក្នុងថង់ដេក"ក៏ដោយ ប៉ុន្តែពួកគេអាចទម្រេតខ្លួនបាន ។
នៅលើអវកាស ទោះបីជាអវកាសយានិកមិនអាចងូតទឹកដូចនៅលើផែនដី ក៏ប៉ុន្តែអវកាសយានិកអាចងូតទឹកក្នុង”បន្ទប់រុំងូតទឹក” ដោយកាន់យកបំពង់ទឹកងូតទឹកសម្អាតខ្លួន ។
នៅក្នុងស្ថានីយអវកាសអ្នករចនាបានរៀបចំឧបករណ៍មួយសម្រាប់បំពាក់ឱ្យអវកាសយានិក ។ អវកាសយានិកអាចកែសម្រួលភ្លើងបំភ្លឺ របៀបគេង របៀបធ្វើការ របៀបហាត់កីឡាជាដើមតាមរយៈ Appតាមតម្រូវការផ្ទាល់ខ្លួន អំពូលភ្លើងខុសៗគ្នាអាចប្តូរតាមអារម្មណ៍របស់អវកាសយានិកនិងជៀសវាងភាពមិនសុខស្រួលដែលបណ្តាលមកពីការស្ថិតនៅក្នុងបរិយាកាសឯកោក្នុងរយៈពេលយូរ ។