គិតរហូតដល់ថ្ងៃទី១៩ ខែមិថុនា ប្រទេសចិនបានចាក់វ៉ាក់សាំងជំងឺកូវីដ១៩ចំនួនសរុប១ពាន់លានដូស ប្រព័ន្ធសារព័ត៌មានសំខាន់ៗជាច្រើននៅលើពិភពលោកបានចាប់អារម្មណ៍ដល់ព័ត៌មានមួយនេះ ហើយបានអះអាងថា នេះជា “ល្បឿនចិនដ៏គួរឱ្យភ្ញាក់ផ្អើល” ។
ស្ថានីយទូរទស្សន៍CNN របស់អាមេរិកបានផ្សាយព័ត៌មានថា ប្រទេសចិនបានដាក់ចេញ “ផែនការចាក់វ៉ាក់សាំងដ៏ល្អឥតខ្ជោះ” ការចាក់វ៉ាក់សាំងចំនួន១ពាន់លានដូសជា “និមិត្តសញ្ញាដ៏គួរឱ្យភ្ញាក់ផ្អើល” មួយ។
កាសែត The New York Times បានផ្សាយដំណឹងថា ដោយសារប្រើប្រាស់បច្ចេកទេសខ្ពស់និងការអនុវត្តយ៉ាងឆាប់រហ័ស បានជាប្រទេសចិនបានទប់ស្កាត់ការរីករាលដាលនៃជំងឺកូវីដ១៩ដោយជោគជ័យ បច្ចុប្បន្ននេះ បាននិងកំពុងប្រើប្រាស់វីធីសាស្ត្រដ៏ខ្លាំងក្លាដូចគ្នា សម្រាប់រៀបចំចាត់ចែងការងារចាក់វ៉ាក់សាំង ។
នាពេលថ្មីៗកន្លងទៅនេះ កាសែត The Wall Street Journal បានចុះផ្សាយដំណឹងថា នៅឆមាសទីមួយឆ្នាំ២០២១ ការរួមចំណែកនៃវ៉ាក់សាំងជំងឺកូវីដ១៩របស់ចិនក្នុងយុទ្ធនាការចាក់វ៉ាក់សាំងនៅប្រទេសកំពុងអភិវឌ្ឍន៍នៃទ្វីបអាស៊ី ធ្វើឱ្យអ្នកផងចាប់អារម្មណ៍ ប្រទេសចិនបានផ្តល់ជំនួយដល់រដ្ឋាភិបាលនៃប្រទេសមួយចំនួនដើម្បីជំរុញយុទ្ធនាការចាក់វ៉ាក់សាំង ។ ទង្វើរបស់ចិនធ្វើឱ្យអ្នកផងមានចំណាប់អារម្មណ៍ថា ក្នុងគ្រាមានភាពលំបាក ប្រទេសចិនតែងតែចេញមុខជួយដោះស្រាយបញ្ហា ។ អ្នកផងទាំងពួងនឹងចងចាំថា ប្រទេសចិនបានចាត់វិធានការទប់ស្កាត់យ៉ាងឆាប់រហស័យតាមរបៀបណា ដើម្បីគ្រប់គ្រងការរីករាលដាលនៃជំងឺឆ្លងនៅក្នុងស្រុក បន្ទាប់មកបានផ្តល់វ៉ាក់សាំងដល់បរទេសថែមទៀត ៕