ថ្ងៃទី២២ខែមិថុនា អ្នកនាំពាក្យក្រសួងការបរទេសចិនបានឆ្លើយសំណួររបស់អ្នកសារព័ត៌មានអំពីការដែលប្រទេសជាមិត្តថ្លែងសុន្ទរកថារួមដើម្បីសម្តែងការគាំទ្រដល់ប្រទេសចិនក្នុងកិច្ចប្រជុំលើកទី៤៧នៃក្រុមប្រឹក្សាសិទ្ធិមនុស្សអង្គការសហប្រជាជាតិ។
អ្នកនាំពាក្យរូបនេះបានថ្លែងថា ក្នុងកិច្ចប្រជុំលើកទី៤៧នៃក្រុមប្រឹក្សាសិទ្ធិមនុស្សអង្គការសហប្រជាជាតិនៅថ្ងៃទី២២ខែមិថុនា ប្រទេសបេឡារុសតំណាងឱ្យប្រទេសចំនួន៦៥ថ្លែងសុន្ទរកថារួម ដោយគូសបញ្ជាក់ថា ការគោរពអធិបតេយ្យភាព ឯករាជ្យនិងបូរាណភាពទឹកដីនៃបណ្តាប្រទេសនានា និងមិនជ្រៀតជ្រែកកិច្ចការផ្ទៃក្នុងនៃប្រទេសមានអធិបតេយ្យភាព គឺជាក្រមមូលដ្ឋាននៃទំនាក់ទំនងអន្តរជាតិ កិច្ចការហុងកុង ស៊ីនជាំងនិងស៊ីចាំងជាកិច្ចការផ្ទៃក្នុងរបស់ប្រទេសចិន មជ្ឈដ្ឋានខាងក្រៅមិនគួរជ្រៀតជ្រែកនោះទេ។ចំណែករដ្ឋសមាជិកចំនួន៦នៃក្រុមប្រឹក្សាសហប្រតិបត្តិការឈូងសមុទ្របានផ្ញើលិខិតដើម្បីគាំទ្រគោលជំហររបស់ប្រទេសចិន ហើយប្រទេសជាង២០ត្រៀមបង្ហាញការគាំទ្រនិងឆ្លើយតបនឹងប្រទេសចិនតាមរបៀបថ្លែងសុន្ទរកថារៀងៗខ្លួនជាដើម។
អ្នកនាំពាក្យរូននេះថ្លែងទៀតថា កំណត់ត្រាផ្នែកសិទ្ធិមនុស្សនៃប្រទេសកាណាដា អាមេរិកនិងអង់គ្លេសជាដើមធ្វើឱ្យយើងមានការភ្ញាក់ផ្អើលយ៉ាងខ្លាំង កុមារជនជាតិដើមភាគតិចរងការធ្វើបាបយ៉ាងអាណោចអាធម្ម ការប្រើអំពើហិង្សារបស់ប៉ូលិសបានកើតឡើងជាញឹកញាប់ បញ្ហាពូជសាសន៍និយមពិបាកនឹងត្រូវដោះស្រាយ កាំភ្លើងមាននៅពាសវាលពាសកាល ហើយពាក្យសម្តីនិងទង្វើដែលប្រឆាំងជនជាតិជ្វីប ប្រឆាំងមូស្លឹម ប្រឆាំងពលរដ្ឋដើមកំណើតអាហ្រ្វិកនិងប្រឆាំងពលរដ្ឋដើមកំណើតអាស៊ីបានកើតឡើងជាញឹកញាប់ ការធ្វើអន្តរាគមន៍ដោយកម្លាំងយោធាបណ្តាលឱ្យមានគ្រោះមហន្តរាយមនុស្សធម៌យ៉ាងខ្លាំងក្លា វិធានការបង្ខិតបង្ខំដោយឯកតោភាគីបានរំលោភលើសិទ្ធិមនុស្សជាមូលដ្ឋាននៃប្រទេសដទៃ ។ល។ ប្រឈមមុខនឹងសកម្មភាពដ៏អាក្រក់ទាំងនេះ ពួកគេមានសិទ្ធិអីមកនិយាយថាអ៊ីចេះថាអ៊ីចុះចំពោះសភាពការណ៍សិទ្ធិមនុស្សរបស់ប្រទេសដទៃនោះ? មានសិទ្ធិអីមកនិយាយឆ្កាដៃឆ្កាជើងចំពោះកិច្ចការផ្ទៃក្នុងរបស់ប្រទេសដទៃនោះ?