បន្ទាប់ពីបញ្ចប់កិច្ចពិភាក្សាជាមួយលោកស្រី Wendy Sherman អនុរដ្ឋមន្ត្រីក្រសួងការបរទេសអាមេរិកនៅក្រុងTianjin ប្រទេសចិនកាលពីថ្ងៃទី ២៦ ខែកក្កដា លោកXieFeng អនុរដ្ឋមន្ត្រីក្រសួងការបរទេសចិនបានថ្លែងទៅកាន់ប្រព័ន្ធសារព័ត៌មានថា ក្នុងកិច្ចពិភាក្សានេះ ភាគីចិនបានលើកឡើងសំណូមពរចំនួនពីរចំពោះភាគីអាមេរិក ទីមួយ គឺសំណូមពរស្តីពីការកែតម្រូវកំហុសគោលនយោបាយ ពាក្យសម្តីនិងទង្វើរបស់អាមេរិកដែលធ្វើចំពោះប្រទេសចិន ទីពីរ គឺសំណូមពរស្តីពីករណីសំខាន់ៗដែលភាគីចិនយកចិត្តទុកដាក់ខ្លាំង ។
ក្នុងសំណូមពរទីមួយ ភាគីចិនបានដាស់តឿនឱ្យភាគីអាមេរិកលុបចោលការដាក់កំហិតចំពោះទិដ្ឋាការរបស់សមាជិកបក្សកុម្មុយនិស្តចិនព្រមទាំងគ្រួសាររបស់ពួកគេ លុបចោលការដាក់ទណ្ឌកម្មចំពោះថ្នាក់ដឹកនាំ មន្ត្រី និងស្ថាប័នរដ្ឋាភិបាលរបស់ប្រទេសចិន ។
ក្នុងសំណូមពរស្តីពីករណីសំខាន់ៗដែលភាគីចិនយកចិត្តទុកដាក់ខ្លាំង ភាគីចិនបាន ផ្តោតសំខាន់ទៅលើករណីដែលនិស្សិតចិនដែលបន្តការសិក្សានៅអាមេរិកមួយចំនួនត្រូវអាមេរិកបដិសេធផ្តល់ទិដ្ឋាការ និងករណីដែលប្រជាពលរដ្ឋចិនមួយចំនួនបានរងភាពមិនយុតិ្តធម៌នៅអាមេរិកជាដើម ភាគីចិនបានទាមទារឱ្យអាមេរិកស្វែងរកដំណោះស្រាយឱ្យបានឆាប់ដោយគោរពតាមការពិត ក្នុងន័យគាំពារសិទ្ធិនិងផលប្រយោជន៍ស្របច្បាប់របស់ប្រជាពលរដ្ឋចិននិងស្ថាប័នចិននៅសហរដ្ឋអាមេរិក ។