នៅថ្ងៃទី ២៧ ខែកក្កដា ពិធីបើកវេទិកាអភិបាលកិច្ចជាតិនិងភាពជាអ្នកដឹកនាំរបស់អង្គការសហប្រតិបត្តិការសៀងហៃបានធ្វើឡើងដំណាលគ្នានៅទីក្រុងប៉េកាំងនិងតាមប្រព័ន្ធវីដេអូ។ លោក Chen Xi សមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិននិងជាប្រធានវិទ្យាស្ថានរដ្ឋបាលជាតិបានអញ្ជើញចូលរួមនិងថ្លែងសុន្ទរកថាតាមរយៈវីដេអូ។
លោក Chen Xi បានលើកឡើងថា ការអភិវឌ្ឍរបស់ចិនមិនត្រឹមតែផ្តល់ផលប្រយោជន៍ដល់ប្រជាជនចិនប៉ុណ្ណោះទេ ថែមទាំងក៏មានអំណោយផលដល់ពិភពលោកទាំងមូលផងដែរ។ វិទ្យាស្ថានរដ្ឋបាលជាតិនៃប្រទេសចិនមានឆន្ទៈក្នុងការពង្រីកការផ្លាស់ប្តូរនិងកិច្ចសហប្រតិបត្តិការជាមួយវិទ្យាស្ថានរដ្ឋបាលនៃរដ្ឋជាសមាជិកនៃអង្គការសហប្រតិបត្តិការសៀងហៃ ដើម្បីរួមវិភាគទានថ្មីក្នុងការកសាងសហគមន៍រួមវាសនានៃអង្គការសហប្រតិបត្តិការសៀងហៃដែលមានភាពកាន់តែជិតស្និទ្ធ។
គួររំលឹកថា វេទិកានេះគឺជាសកម្មភាពមួយក្នុងចំណោមសកម្មភាពពាក់ព័ន្ធមួយចំនួនដើម្បីអបអរសាទរខួប ២០ នៃការបង្កើតអង្គការសហប្រតិបត្តិការសៀងហៃដោយមានការចូលរួមពីតំណាងប្រមាណ ២០០ រូបមកពីរដ្ឋសមាជិកអង្គការសហប្រតិបត្តិការសៀងហៃ ប្រទេសអ្នកសង្កេតការណ៍ ដៃគូសន្ទនា និងអង្គការអន្តរជាតិ ។