គណៈកម្មាធិការទំនាក់ទំនងអ៊ីស្លាមរបស់អាមេរិកដែលជាអង្គការសិទ្ធិមនុស្សពលរដ្ឋមូស្លឹមធំជាងគេនៅអាមេរិកបានចេញផ្សាយរបាយការណ៍ប្រចាំឆ្នាំ២០២១ ដោយបង្ហាញឱ្យឃើញថា ក្នុងសង្គមអាមេរិកកើតមានបាតុភាពរើសអើងពលរដ្ឋមូស្លឹមកាន់តែធ្ងន់ធ្ងរពីមួយថ្ងៃទៅមួយថ្ងៃ ដូចជាការរើសអើងក្នុងកន្លែងការងារ ការដាក់កំហិតក្នុងការធ្វើអន្តោប្រវេសន៍និងធ្វើទេសចរណ៍ ប្រកាន់ទស្សនៈលំអៀង ប្រព្រឹតិ្តអំពើរំលោភសិទិ្ធ និងការអនុវត្តច្បាស់ដោយរំលោភសិទ្ធិជាដើម ។ នៅឆ្នាំ២០២០ គណៈកម្មាធិការនេះទទួលបានពាក្យបណ្តឹងចំនួន៦១៤៤ ច្បាប់ដែលពាក់ព័ន្ធនឹងការរើសអើងពលរដ្ឋមូស្លឹមក្នុងក្របខណ្ឌទូទាំងអាមេរិក បានកើនឡើង៩ភាគរយបើប្រៀបធៀបនឹងតួលេខដែលគណៈកម្មាធិការនេះប្រកាសនៅឆ្នាំ២០១៨ ។
លោក Arun Kundnani សាស្ត្រាចារ្យរងផ្នែកប្រព័ន្ធសារព័ត៌មាន វប្បធម៌និងវិទ្យាសាស្ត្រទំនាក់ទំនងរបស់សកលវិទ្យាល័យក្រុង ញូវយ៉ក បានសង្កេតឃើញថា ការដែលសង្គមអាមេរិកមានបាតុភាពរើសអើងពលរដ្ឋមូស្លឹមកាន់តែធ្ងន់ធ្ងរឡើង គឺកើតចេញពីស្រទាប់ជ្រៅក្នុងសង្គម ។ បើមើលពីក្នុងស្រុក នាប៉ុន្មានឆ្នាំកន្លងទៅនេះ ការបែងចែកប្រភពធនធានរបស់អាមេរិកមានអតុល្យភាពយ៉ាងធ្ងន់ធ្ងរ គម្លាតឆ្ងាយដាច់ពីគ្នារវាងអ្នកមាននិងអ្នកក្រកាន់តែខ្លាំងឡើងៗ ។ បើមើលពីទំនាក់ទំនងជាមួយបរទេស អាមេរិកបានបំផុសសង្គ្រាមនៅអាហ្វហ្គានីស្ថាននិងអ៊ីរ៉ាក់ជាដើមជាបន្តបន្ទាប់ ព្រមទាំងស្ថិតក្នុងសភាពជាប់គាំងក្នុងរឿងនេះ ។ បញ្ហាទាំងក្នុងស្រុកនិងបរទេសបណ្តាលឱ្យគំនិតជ្រុលនិយមផុសឡើងវិញក្នុងសង្គមអាមេរិក រីឯក្រុមមនុស្សមួយចំនួនប៉ុនប៉ងស្វែងរកអ្នកទទួលទោសជំនួស ដើម្បីបានដកខ្លួនចេញពីភាពជាប់គាំង ៕