យប់ថ្ងៃទី៤ ខែសីហា ក្នុងកិច្ចប្រជុំរដ្ឋមន្ត្រីការបរទេសនៃសន្និសីទកំពូលអាស៊ីបូព៌ាលើកទី១១ បន្ទាប់ពីលោក Wang Yi សមាជិកក្រុមប្រឹក្សាកិច្ចការរដ្ឋ និងជារដ្ឋមន្ត្រីការបរទេសចិនបានថ្លែងសុន្ទរកថាពាក់ព័ន្ធនឹងកិច្ចសហប្រតិបតិ្តការអាស៊ីបូព៌ារួច មានប្រទេសមួយចំនួនតូច ដូចជាអាមេរិកនិងជប៉ុនជាដើមបានលើកឡើងបញ្ហាស៊ីនជាំងនិងហុងកុងរបស់ប្រទេសចិន ក្នុងន័យវាយប្រហារប្រទេសចិនដោយយកសិទ្ធិមនុស្សធ្វើជាលេស ។ លោក Wang Yi បានទាមទារថ្លែងសុន្ទរកថាជាលើកទីពីរ ដើម្បីច្រានចោលយ៉ាងម៉ឺងមាត់ចំពោះករណីជ្រៀតជ្រែកកិច្ចការផ្ទៃក្នុងនេះ ។
លោក Wang Yi បានថ្លែងថា ដូចការនឹកគិតអ៊ីចឹងមែន ប្រទេសមួយចំនួនតូចដូចជាអាមេរិកជាដើម ចង់ឆ្លៀតយកវេទិកាពហុភាគីនេះមកវាយប្រហារនិងលាបព័ណ៌កិច្ចការផ្ទៃក្នុងរបស់ប្រទេសចិន ។ ពាក្យសំដីច្រំដែលនិងខុសឆ្គងមិនគួរឱ្យរំលឹកទេ ហើយបណ្តាប្រទេសអាស៊ាននានាក៏មិនបានដើរតាមប្រទេសមួយចំនួនតូចដូចជាអាមេរិកជាដើមនោះដែរ ប៉ុន្តែដោយគិតពីគោលការណ៍ស្មើភាព ប្រទេសចិនមានសិទ្ធិច្រានចោលអ្វីដែលខុសឆ្គង ។
លោក Wang Yi បានថ្លែងទៀតថា កិច្ចការស៊ីនជាំងនិងហុងកុងសុទ្ធតែជាកិច្ចការផ្ទៃក្នុងរបស់ប្រទេសចិន ប្រទេសមួយចំនួនតូចដូចជាអាមេរិកជាដើមតែងនិយាយឆ្ការដៃឆ្ការជើង ប្រើពាក្យភូតកុហកនិងលាបព័ណ៌ចំពោះកិច្ចការផ្ទៃក្នុងរបស់ប្រទេសចិន ប្រការទាំងនេះបានល្មើសយ៉ាងធ្ងន់ធ្ងរនូវក្រមមូលដ្ឋាននៃទំនាក់ទំនងអន្តរជាតិ បានបំផ្លិចបំផ្លាញយ៉ាងធ្ងន់ធ្ងរដល់គោលការណ៍ស្មើភាពនៃប្រទេសមានអធិបតេយ្យភាព ។ និយាយចំពោះទង្វើដ៏អាក្រក់បែបនេះ ពួកគេលើកឡើងម្តង ចិននឹងច្រានចោលយ៉ាងម៉ឺងមាត់ម្តង ៕