ថ្ងៃទី២៤ខែសីហា ក្រុមប្រឹក្សាសិទ្ធិមនុស្សនៃអង្គការសហប្រជាជាតិបានបើកធ្វើកិច្ចប្រជុំពិសេសអំពីបញ្ហាអាហ្វហ្គានីស្ថាន។ តំណាងនៃប្រទេសជាច្រើន ដូចជាប្រទេសចិន គុយបា វ៉េណេស៊ុយអេឡានិងអ៊ីរ៉ង់ជាដើមបានលើកឡើងថា ការជ្រៀតជ្រែកខាងយោធារបស់ប្រទេសអាមេរិកជាដើមបាននាំមកនូវគ្រោះមហន្តរាយយ៉ាងធ្ងន់ធ្ងរដល់ប្រជាជនអាហ្វហ្គានីស្ថាន។
លោកChenXuតំណាងចិនប្រចាំជាអចិន្រ្តៃយ៍នៅទីស្នាក់ការក្រុងហ្សឺណែវអង្គការសហប្រជាជាតិនិងជាតំណាងចិនប្រចាំនៅអង្គការអន្តរជាតិផ្សេងទៀតនៅស្វ៊ីសបានលើកឡើងថា ស្ថានការណ៍អាហ្វហ្គានីស្ថានមានការផ្លាស់ប្តូរយ៉ាងខ្លាំងក្លា ប្រទេសចិនគោរពក្តីបំណងនិងជម្រើសរបស់ប្រជាជនអាហ្វហ្គានីស្ថាន។ ភារកិច្ចបន្ទាន់នាពេលបច្ចុប្បន្នគឺត្រូវស្តារសន្តិភាព ស្ថិរភាពនិងសណ្តាប់ធ្នាប់ឡើងវិញក្នុងពេលឆាប់ៗ។ សន្តិសុខនិងផលប្រយោជន៍របស់ជនស៊ីវិលអាហ្វហ្គានីស្ថាននិងពលរដ្ឋបរទេសនៅអាហ្វហ្គានីស្ថានចាំបាច់ត្រូវទទួលបានការធានា ហើយសិទ្ធិនិងផលប្រយោជន៍របស់ស្ថាប័នការទូតនិងបុគ្គលិកការទូតប្រចាំនៅអាហ្វហ្គានីស្ថានមិនអនុញ្ញាតឱ្យមានការបំពាននោះទេ។ភាគីចិនចាប់អារម្មណ៍ថា អង្គការតាលីបង់បានថ្លែងជាសាធារណៈជាច្រើនលើកថានឹងដោះស្រាយបញ្ហាដែលប្រជាជនត្រូវប្រឈមមុខ បំពេញតាមតម្រូវការនិងក្តីបំណងរបស់ប្រជាជន ហើយធ្វើកិច្ចខិតខំប្រឹងប្រែងដើម្បីបង្កើតរដ្ឋាភិបាលអ៊ីស្លាមមួយដែលប្រកបដោយភាពបើកទូលាយនិងបរិយាប័ន្ន ព្រមទាំងបានប្រកាសថានឹងលើកលែងទោសចំពោះអតីតមន្រ្តីនិងបុគ្គលិករដ្ឋាភិបាល ក៏ដូចជាសន្យាថា នឹងធានាដល់សិទ្ធិនិងផលប្រយោជន៍របស់ស្ត្រី ដូចជាសេរីភាពនៃការបញ្ចេញមតិ ឱកាសការងារនិងការទទួកបានការអប់រំជាដើម។
តំណាងវ៉េណេស៊ុយអេឡាបានលើកឡើងថា អាមេរិកនិងសម្ព័ន្ធមិត្តបានធ្វើការគំរាមកំហែងនិងជ្រៀកជ្រែតខាងយោធាអស់រយៈពេល២០ឆ្នាំហើយចំពោះអាហ្វហ្គានីស្ថាន ដែលបណ្តាលឱ្យកើតមានសកម្មភាពរំលោភបំពានសិទ្ធិមនុស្សដោយទ្រង់ទ្រាយធំនិងបាតុភូតមិនដាក់ទោសលើបទឧក្រិដ្ឋ បាននាំមកនូវភាពច្របូកច្របល់ ការបំផ្លិចបំផ្លាញនិងការកាប់សម្លាប់គ្នាដល់ប្រជាជនអាហ្វហ្គានីស្ថានដែលបានបង្កជាឧក្រិដ្ឋកម្មប្រឆាំងមនុស្សជាតិ។
តំណាងអ៊ីរ៉ង់បានថ្លែងថា ការជ្រៀតជ្រែកខាងយោធារបស់អាមេរិកជាដើមបាននាំមកនូវការបំផ្លិចបំផ្លាញ ការឈឺចាប់និងការអស់សង្ឃឹមដ៏ច្រើនរាប់មិនអស់ដល់អាហ្វហ្គានីស្ថាន ក៏ដូចជានាំមកនូវភាពវឹកវរនិងគ្រោះថ្នាក់ក្នុងតំបន់ អាមេរិកជាដើមចាំបាច់ត្រូវរ៉ាប់រងទំនួលខុសត្រូវចំពោះរឿងនេះ ៕