ថ្ងៃទី១៩ខែតុលាឆ្នាំ២០២១ គណៈកម្មាធិការកីឡាអូឡាំពិកប្រទេសក្រិកបានប្រគល់ជាផ្លូវការនូវរងើកភ្លើងនៃការប្រកួតកីឡាអូឡាំពិករដូវរងារក្រុងប៉េកាំងជូនចំពោះគណៈកម្មាធិការកីឡាអូឡាំពិករដូវរងារក្រុងប៉េកាំងនៅកីឡាដ្ឋានPanathinaikoនៅក្រុងAthensរាជធានីប្រទេសក្រិក។ លោកPanagiotis Pikrammenos ឧបនាយករដ្ឋមន្រ្តីក្រិក ប្រធានគណៈកម្មាធិការកីឡាអូឡាំពិកប្រទេសក្រិកនិងលោក Yu Zaiqing តំណាងពិសេសនៃគណៈកម្មាធិការកីឡាអូឡាំពិករដូវរងារក្រុងប៉េកាំងនិងជាអនុប្រធានគណៈកម្មាធិការកីឡាអូឡាំពិករដូវរងារក្រុងប៉េកាំងបានរួមគ្នាចូលរួមពិធីប្រគល់រងើកភ្លើងនៅថ្ងៃដដែល។
ពិធីនេះបានចាប់ផ្តើមប្រារព្ធធ្វើនៅម៉ោង ១២ ថ្ងៃត្រង់ គប់ភ្លើងត្រូវបានប្រគល់ឱ្យមនុស្ស៣នាក់តៗគ្នាក្នុងកីឡាដ្ឋាន ក្នុងនោះអ្នកកាន់គប់ភ្លើងទី២គឺជាអ្នកនាង Li Nina អត្តពលិកប្រទេសចិន។
ថ្លែងសុន្ទរកថាក្នុងពិធីលើកនេះ លោក Yu Zaiqing អនុប្រធានគណៈកម្មាធិការកីឡាអូឡាំពិករដូវរងារក្រុងប៉េកាំងបានលើកឡើងថា ថ្ងៃទី៣០ខែមីនា ឆ្នាំ២០០៨ ប្រទេសចិនបានទទួលយករងើកភ្លើងនៃការប្រកួតកីឡាអូឡាំពិកក្រុងប៉េកាំងនៅទីនេះ ហើយបានរួមជាមួយប្រជាជនពិភពលោករៀបចំធ្វើការប្រកួតកីឡាអូឡាំពិកដ៏អស្ចារ្យមួយ។ ថ្ងៃនេះ ប្រទេសចិនបានទទួលយករងើកភ្លើងនៃការប្រកួតកីឡាអូឡាំពិករដូវរងាក្រុងប៉េកាំងទៀត រងើកភ្លើងដែលប្រកបដោយស្មារតីអូឡាំពិកនឹងបញ្ចេញពន្លឺមិត្តភាពនិងសន្តិភាពនៅទឹកដីប្រទេសចិនម្តងទៀត។
ប្រធានគណៈកម្មាធិការកីឡាអូឡាំពិកប្រទេសក្រិកបានថ្លែងថា ក្រុងប៉េកាំងបាននិងកំពុងបង្កើតប្រវត្តិសាស្រ្តដែលក្លាយជាទីក្រុងទីមួយដែលធ្វើជាម្ចាស់ផ្ទះក្នុងការប្រកួតកីឡាអូឡាំពិករដូវក្តៅនិងការប្រកួតកីឡាអូឡាំពិករដូវរងា។ យើងខ្ញុំរីករាយណាស់ដែលអាចប្រគល់រងើកភ្លើងនៃកីឡាអូឡាំពិកជូនចំពោះប្រទេសចិននៅទីនេះ ដោយសារតែប្រទេសក្រិកក៏ក្លាយជាផ្នែកមួយនៃប្រវត្តិសាស្រ្តនេះផងដែរ៕