នៅព្រឹកថ្ងៃទី ២៦ ខែតុលា លោក LiuHe សមាជិកការិយាល័យនយោបាយនៃគណៈកម្មាធិការមជ្ឈិមបក្សកុម្មុយនិស្តចិន ឧបនាយករដ្ឋមន្ត្រីចិននិងជាប្រធានប្រតិភូចិនសម្រាប់កិច្ចសន្ទនាផ្នែកសេដ្ឋកិច្ចគ្រប់ជ្រុងជ្រោយរវាងចិននិងអាមេរិកបានជួបសន្ទនាតាមប្រព័ន្ធវីដេអូជាមួយលោកស្រី Janet Yellen រដ្ឋមន្ត្រីក្រសួងហិរញ្ញវត្ថុអាមេរិកតាមការណាត់ ។ ភាគីទាំងពីរបានផ្លាស់ប្តូរមតិយោបល់ប្រកបដោយភាពជាក់ស្តែង ភាពស្មោះត្រង់និងលក្ខណៈស្ថាបនាអំពីស្ថានការណ៍ម៉ាក្រូសេដ្ឋកិច្ចនិងកិច្ចសហប្រតិបត្តិការក្នុងវិស័យពហុភាគីនិងទ្វេភាគី ។
នាពេលបច្ចុប្បន្ននេះ ដោយសារផលប៉ះពាល់ពីការរីករាលដាលនៃជំងឺកូវីដ ១៩ នៅតែមិនទាន់បញ្ចប់នៅឡើយ បានជាការងើបឡើងវិញនៃសេដ្ឋកិច្ចសកលកំពុងស្ថិតក្នុងដំណាក់កាលគន្លឹះ ។ គ្មានអ្វីគួរឱ្យសង្ស័យឡើយ ការបង្កើនការប្រាស្រ័យទាក់ទងនិងកិច្ចសម្របសម្រួលផែ្នកគោលនយោបាយម៉ាក្រូរវាងចិននិងអាមេរិកវាមានសារសំខាន់ណាស់ ។ ប្រការដែលគួរតែសង្កត់ធ្ងន់នោះគឺ មានតែប្រកាន់អាកប្បកិរិយាស្មើភាពនិងគោរពគ្នាទៅវិញទៅមក ទើបអាចសម្រេចបាននូវការប្រាស្រ័យទាក់ទងនិងកិច្ចសម្របសម្រួលដែលប្រកបអត្ថន័យ ។ មានតែដោះស្រាយការយកចិត្តទុកដាក់ដ៏សមហេតុផលរវាងគ្នាទៅវិញទៅមកតាមរយៈការពិគ្រោះពិភាក្សា ទើបអាចបង្កលក្ខខណ្ឌដ៏ល្អប្រសើរសម្រាប់ការអភិវឌ្ឍទំនាក់ទំនងសេដ្ឋកិច្ចនិងពាណិជ្ជកម្មរវាងប្រទេសទាំងពីរប្រកបដោយភាពរឹងមាំ ក៏ដូចជាការងើបឡើងវិញនៃសេដ្ឋកិច្ចសកល ។
បទពិសោធន៍ប្រវត្តិសស្ត្របានបញ្ជាក់ថា ការដែលភាគីចិននិងអាមេរិកបានធ្វើកិច្ចសន្ទនាប្រកបដោយលក្ខណៈស្ថាបនាគឺមានអំណោយផលដល់ការកំណត់ទិសដៅត្រឹមត្រូវនៃទំនាក់ទំនងសេដ្ឋកិច្ចនិងពាណិជ្ជកម្មទ្វេភាគី ក៏ដូចជាផ្តល់ផលប្រយោជន៍ដល់ប្រទេសទាំងពីរនិងពិភពលោក ៕