នាថ្ងៃទី២៣ ខែមករា អាណិកជនចិននិងជនជាតិចិននៅប្រទេសកម្ពុជា បានរៀបចំពិព័រណ៍រូបថតនិងអក្សរផ្ចង់ចិននៅរាជធានីភ្នំពេញ ដើម្បីអបអរសាទរនិងបង្ហាញការគាំទ្រចំពោះកីឡាអូឡាំពិករដូវរងាក្រុងប៉េកាំង។
ពិព័រណ៍លើកនេះធ្វើក្រោមប្រធានបទ “អបអរសាទរកីឡាអូឡាំពិករដូវរងា ទទួលបុណ្យចូលឆ្នាំថ្មីប្រពៃណីចិន និងគាំទ្រចំពោះភាពអស្ចារ្យនៃព្រឹត្តិការណ៍កីឡាអូឡាំពិករដូវរងាក្រុងប៉េកាំងឆ្នាំ២០២២ ” ដែលបានតាំងបង្ហាញរូបថតចំនួន២៣៨ សន្លឹក និងស្នាដៃអក្សរផ្ចង់ចិនជាង ១០០ ផ្ទាំងពាក់ព័ន្ធនឹងកីឡាអូឡាំពិករដូវរងាក្រុងប៉េកាំង។ ការតាំងពិព័រណ៍នេះមានរយៈពេលពីរខែ។
បន្ទាប់ពីទស្សនាពិព័រណ៍ ឯកឧត្តម វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានថ្លែងថា ប្រទេសកម្ពុជាសូមគាំទ្រយ៉ាងពេញទំហឹងចំពោះក្រុងប៉េកាំងក្នុងការរៀបចំកីឡាអូឡាំពិករដូវរងា ព្រមទាំងប្រឆាំងនឹងការធ្វើឱ្យកីឡាក្លាយជាបញ្ហានយោបាយទោះតាមទម្រង់ណាក៏ដោយ។ លោកបានបន្តថា ក្រុងប៉េកាំងធ្វើបានល្អណាស់ក្នុងការត្រៀមរៀបចំបានចាត់វិធានការបង្ការ និងគ្រប់គ្រងជំងឺឆ្លងយ៉ាងពេញលេញ លោកបានជូនពរទុកជាមុនសូមឱ្យការរៀបចំកីឡាអូឡាំពិករដូវរងាក្រុងប៉េកាំងទទួលបានជោគជ័យយ៉ាងគាប់ប្រសើរ។
លោក ឆាន បុចា ជាអ្នកទស្សនាបានបញ្ជាក់ថា ប្រទេសចិនធ្វើការងារជាច្រើនសម្រាប់កីឡាអូឡាំពិកនេះ ដូច្នេះកីឡាអូឡាំពិករដូវរងាក្រុងប៉េកាំងពិតនឹងទទួលជោគជ័យ ។
លោក ចា ឡេនឌីដា ជំនួយការសមាគមអ្នកសរសេរអក្សរផ្ចង់ចិននៅកម្ពុជាបានរៀបរាប់ថា ខ្ញុំជឿជាក់ថា កីឡាអូឡាំពិករដូវរងាក្រុងប៉េកាំងមិនគ្រាន់តែជាព្រឹត្តិការណ៍កីឡាប៉ុណ្ណោះទេ ថែមទាំងជាព្រឹត្តិការណ៍វប្បធម៌មួយ ដើម្បីបង្ហាញពីភាពទាក់ទាញរបស់វប្បធម៌ចិន ។
អ្នកបកប្រែ៖刘蓉