យុវជនចិនពីររូបដែលអាយុមិនដល់២០ ឆ្នាំផង ទទួលបានជ័យលាភីដ៏អស្ចារ្យបំផុតក្នុងការប្រកួតកីឡាអូឡាំពិករដូវរងាក្រុងប៉េកាំង! យុវជន Su Yiming អាយុ ១៧ ឆ្នាំ និងយុវតី Gu Ailing បានបង្ហាញនូវរូបភាពជាយុវជនវ័យក្មេងរបស់ប្រទេសចិនដែលរាក់ទាក់កក់ក្តៅ ទៅកាន់ពិភពលោក ប្រកបដោយភាពបរិយាប័ន្ននិងភាពសកម្មតាមរយៈការប្រកួតដ៏ក្លាហាននិងឥរិយាបថបើកទូលាយ។
ក្នុងការប្រកួតផ្តាច់ព្រ័ត្រនៃវិញ្ញាសាឧបសគ្គជំរាលនៃការជិះក្តារស្គី Su Yiming បានចូលប្រកួតចុងក្រោយ។ ខណៈពេលដែលកីឡាកររជម្រើសជាតិកាណាដាទទួលបានពិន្ទុខ្ពស់៩០,៩៦ គាត់បានអត់ទ្រាំនឹងសម្ពាធ បញ្ចប់នូវចលនាទីមួយ១៨០០ ដឺក្រេក្នុងការប្រកួតទាំងមូល ឈ្នះមេដាយប្រាក់ដ៏មានតម្លៃមួយគ្រឿង។ ចំណែកនាង Gu Ailing ខណៈពេលដែលចាញ់ពន្ទុកីឡាការិនីជម្រើសជាតិបារាំង ៥,២៥ ក្នុងការប្រកួតពីរវគ្គមុន នាងបានលោតចលនាដែលពិបាកខ្លាំងហើយពុំធ្លាប់សាកល្បងក្នុងការប្រកួតមុនៗ គឺ លោតកម្រិត១៦២០ ដឺក្រេ នៅទីបំផុតក៏ដណ្ដើមបានមេដាយមាស ។
កូនគោទើបកើតមិនខ្លាចសត្វខ្លា ហ៊ានចេញច្បាំង និងជំនះលើខ្លួនឯង នេះគឺជាយុវជនចិន! នាង Gu Ailing ក្រោយឈ្នះមេដាយមាសកីឡាអូឡាំពិកគ្រឿងទីមួយរបស់ខ្លួន មិនបានសាទរហួសជ្រុលទេ ហើយទៅលួងលោមកីឡាការិនីជម្រើសជាតិបារាំងដែលមិនបានទទួលមេដាយមាសយ៉ាងសោកស្រាយជាមួយនឹងកីឡាការិនីដែលទទួលបានមេដាយសំរឹទ្ធ។ Su Yiming ជាកីឡាករជម្រើសជាតិតែមួយគត់ដែលបញ្ចប់នូវចលនាកម្រិត ១៨០០ ដឺក្រេក្នុងការប្រកួតទាំងមូល ប៉ុន្តែលោកមិនបានឈ្នះជើងឯក ធ្វើឱ្យអ្នកលេងបណ្តាញអ៊ីនធើណេតបរទេសមិនតិចទេសម្ដែងការមិនពេញចិត្តចំពោះការផ្តល់ពិន្ទុរបស់អាជ្ញាកណ្តាល។ ប៉ុន្តែ គាត់មិនខ្វល់ទេ នៅលើវេទិកាផ្តល់រង្វាន់ គាត់បានឱបជាមួយដៃគូប្រកួតយ៉ាងសប្បាយចិត្ត។
គោរពច្បាប់កំណត់ គោរពដៃគូប្រកួត គោរពមិត្តភាព នេះគឺជាយុវជនចិន! នៅលើសង្វៀនប្រកួត ស្នាដៃរបស់នាង Gu Ailing និង Su Yiming ធ្វើឱ្យពិភពលោកភ្ញាក់ផ្អើល ដំណើរធំលូតលាស់ដ៏សម្បូរបែបរបស់ពួកគេក៏ធ្វើឱ្យអ្នកផងកោតសរសើរផងដែរ។ Su Yiming ក្រៅពីជាកីឡាករជិះក្តារស្គីដ៏ឆ្នើមម្នាក់ គាត់ក៏ជាតារាសម្តែងក្មេងល្បីឈ្មោះដែរ។ គាត់ធ្លាប់និយាយត្រង់ៗថាមិនចង់ធ្វើជាកីឡាករជិះក្តារស្គីអាជីពទេ ប៉ុន្តែពេលក្រុងប៉េកាំងទទួលសិទ្ធិធ្វើជាម្ចាស់ផ្ទះនៃការប្រកួតកីឡាអូឡាំពិករដូវរងាឆ្នាំ២០២២ គាត់បានសម្រេចធ្វើជាកីឡាករជិះក្តារស្គីអាជីព ដើម្បីតំណាងប្រទេសចិនចូលរួមការប្រកួតកីឡាអូឡាំពិក។
នាង Gu Ailing ជាកូនកាត់ចិន-អាមេរិក ធំដឹងក្ដីនៅអាមេរិក ចេះនិយាយភាសាចិនយ៉ាងស្ទាត់ជំនាញ។ នាងជាក្មេងស្រីដែលមានទេពកោសល្យផ្នែកជិះក្តារស្គី ជាសិស្សពូកែនៅសាកលវិទ្យាល័យ Stanford ហើយក៏ជាម៉ូដេលផងដែរ។ នាងរំពឹងថា បទពិសោធន៍របស់ខ្លួនអាចលើកទឹកចិត្តដល់ប្រជាជនចិនកាន់តែច្រើនឱ្យចូលរួមលេងកីឡាព្រិលទឹកកក។
ក្នុងបរិបទវប្បធម៌ចម្រុះ ដំណើរលូតលាស់ខុសៗគ្នា ទស្សនៈរួមដែលកាន់តែរហ័ស កាន់តែខ្ពស់ កាន់តែខ្លាំង កាន់តែសាមគ្គី នេះគឺជាយុវជនចិន ស៊ីសង្វាក់គ្នាជាមួយយុគសម័យ រួមចំណែកដល់ការកសាងប្រទេសជាតិ យុវជនចិនដែលមាននាង Gu Ailingនិង Su Yiming ជាតំណាងបានផ្សារភ្ជាប់ការតស៊ូរបស់ខ្លួនជាមួយការអភិវឌ្ឍរបស់មាតុប្រទេស។ ដើរទាន់យុគសម័យ មិនខ្ជះខ្ជាយពេលវេលាជាយុវវ័យ នេះគឺជាយុវជចិន!