លោក ស៊ី ជីនភីង ប្រធានរដ្ឋចិនបានចូលរួមកិច្ចប្រជុំកំពូលតាមប្រព័ន្ធវីដេអូជាមួយលោកMacronប្រធានាធិបតីបារាំងនិងលោកScholz នាយករដ្ឋមន្រ្តីអាល្លឺម៉ង់នៅទីក្រុងប៉េកាំងកាលពីរសៀលថ្ងៃទី៨ខែមីនា។
លោក ស៊ី ជីនភីង បានគូសបញ្ជាក់ថា ការអភិវឌ្ឍរបស់ប្រទេសចិននឹងនាំមកនូវចន្លោះកាន់តែធំទូលាយដល់កិច្ចសហប្រតិបត្តិការណ៍ចិន-អឺរ៉ុប ភាគីទាំងពីរគួរតែបន្តធ្វើឱ្យស៊ីជម្រៅនូវកិច្ចសហប្រតិបត្តិការជាក់ស្តែងលើវិស័យនានា ប្រកាន់ខ្ជាប់នូវពហុភាគីនិយម ជំរុញរបៀបវារៈដ៏សំខាន់ដែលមានលក្ខណៈជាសកល។
ជាការឆ្លើយតប លោកMacron និងលោកScholz បានសម្តែងការ អបអរសាទរចំពោះភាគីចិនដែលបានរៀបចំព្រឹត្តិការណ៍កីឡាអូឡាំពិករដូវរងាក្រុងប៉េកាំងដោយជោគជ័យ។ បច្ចុប្បន្នពិភពលោកកំពុងប្រឈមមុខនឹងបញ្ហាជាច្រើន ការឆ្លើយតបនឹងបញ្ហាដោយខ្លួនឯងបានត្រឹមតែធ្វើឱ្យស្ថានការណ៍កាន់តែអាក្រក់ទៅៗ តែប៉ុណ្ណោះ។ ភាគីអឺរុបយកចិត្តទុកដាក់ដល់តួនាទីដ៏សំខាន់និងវិជ្ជមានរបស់ប្រទេសចិនក្នុងកិច្ចការពិភពលោក រីករាយធ្វើកិច្ចសហប្រតិបត្តិការយ៉ាងជិតស្និទ្ធជាមួយភាគីចិន រួមគ្នាខិតខំប្រឹងប្រែងដើម្បីដោះស្រាយបញ្ហាប្រឈមសំខាន់ៗដែលមានលក្ខណៈជាសកលដូចជាបម្រែបម្រួលអាកាសធាតុនិង សុខាភិបាលសាធារណៈ ជាដើម ព្រមទាំងជំរុញឱ្យទំនាក់ទំនងរវាងអឺរ៉ុបនិងចិនអភិវឌ្ឍទៅមុខដោយឥតឈប់ឈរ ។
ថ្នាក់ដឹកនាំទាំង៣រូបក៏បានផ្តោតសំខាន់ទៅលើការផ្លាស់ប្តូរមតិយោបល់ស្តីពីស្ថានការណ៍អ៊ុយក្រែននាពេលបច្ចុប្បន្នផងដែរ ។
លោកMacron និងលោកScholzបានថ្លែងថា អឺរ៉ុបកំពុងប្រឈមមុខនឹងវិបត្តិធ្ងន់ធ្ងរបំផុតគិតតាំងពីសង្គ្រាមលោកលើកទី២មក ប្រទេសបារាំងនិងអាល្លឺម៉ង់គាំទ្រការដោះស្រាយបញ្ហាតាមការចរចា។ អរគុណចំពោះគំនិតផ្តួចផ្តើមមនុស្សធម៌ដែលលើកឡើងដោយភាគីចិនបារាំងនិងអាល្លឺម៉ង់រីករាយរួមជាមួយភាគីចិនដើម្បីបង្កើនការប្រាស្រ័យទាក់ទង់និងការសម្របសម្រួល ឱ្យមានការចរចាដោយសន្តិវិធី ចៀសវាងស្ថានការណ៍កាន់តែឡើងកម្តៅថែមមួយកម្រិតទៀត។
លោក ស៊ី ជីនភីង បានគូសបញ្ជាក់ថា ភាគីចិនផ្តួចផ្តើមថាអធិបតេយ្យភាពនិងបូរណភាពទឹកដីរបស់ប្រទេសនានាគួរតែទទួលបានការគោរព កម្មវិត្ថុនិងគោលការណ៍នៃធម្មនុញ្ញអង្គការសហប្រជាជាតិគួរតែទទួលការគោរពនិងប្រតិបត្តិតាម ការយកចិត្តទុកដាក់ដ៏សមរម្យស្តីពីសន្តិសុខរបស់ប្រទេសនានាគួរតែទទួលបានការឱ្យតម្លៃ កិច្ចខិតខំប្រឹងប្រែងទាំងអស់ដែលមានអំណោយផលដល់ការដោះស្រាយវិបត្តិដោយសន្តិវិធីគួរតែទទួលបានការគាំទ្រ។ ពួកយើងគួរតែរួមគ្នាគាំទ្រការចរចាដោយសន្តិវិធីរវាងរុស្ស៊ីនិងអ៊ុយក្រែន ត្រូវចរចាឱ្យមានផ្លែផ្កានិងសន្តិភាព។ ពួកយើងគួររួមគ្នាអំពាវនាវឱ្យរក្សាភាពអត់ធ្មត់ជាអតិបរមា ចៀសវាងលេចចេញវិបត្តិមនុស្សធម៌ដោយទ្រង់ទ្រាយធំ។
ថ្នាក់ដឹកនាំទាំង៣រូបក៏បានផ្លាស់ប្តូរមតិយោបល់ស្តីពីបញ្ហាអ៊ីរ៉ង់ផងដែរ៕