ក្រសួងការបរទេសចិន៖ ចាក់សាំងលើភ្លើងចំពោះបញ្ហាតៃវ៉ាន់ ប្រយ័ត្នត្រូវភ្លើងឆេះរោលខ្លួនឯង

2022-03-29 17:04:25 |ប្រភព:CRI

  ថ្ងៃទី ​២៨ ខែមីនា​ ​លោក​ Wang Wenbin អ្នកនាំពាក្យក្រសួងការបរទេសចិន​បាន​គូសបញ្ជាក់នៅក្នុងសន្និសីទ​កាសែតជាប្រចាំថា​ ​បញ្ហា​តៃវ៉ាន់​និង​បញ្ហា​អ៊ុយក្រែន​មាន​ភាព​​ខុសគ្នា​ដាច់ស្រឡះ​ ​គឺមិនអាចយកមក​ប្រៀបប្រដូច​គ្នា​ទេ​។​ ​បុគ្គល​មួយចំនួន​របស់​អាមេរិក​បាន​ផ្សារភ្ជាប់​​រឿង​គ្មាន​ទំនាក់ទំនង​ទាំងពីរ​នេះ​ជាមួយ​គ្នា​ ​ឆ្លៀស​ឱកាស​​លាប​ពណ៌និង​វាយប្រហារ​ចិន​ ​រឿងនេះគឺ​​​មាន​ចេតនាអាក្រក់​សុទ្ធសាធ​។

  តាមដំណឹងឱ្យដឹងថា​ ​ពេល​ផ្តល់​បទ​សម្ភាសន៍​ ឥស្សរជន​យោធា​អាមេរិក​បាន​ប្រៀប​ប្រដូច​​បញ្ហាអ៊ុយក្រែនជាមួយ​បញ្ហា​តៃវ៉ាន់​ ​ហើយ​និយាយ​បំផ្លើស​ពី​ការ​គំរាមកំហែង​របស់ចិន​ដោយ​គ្មាន​ហេតុផល​។​ ​ទាក់ទិននឹង​ករណីនេះ​ ​​លោក​ Wang Wenbin អ្នកនាំពា​ក្យ​ក្រសួង​ការបរទេសចិន​បាន​ថ្លែងថា​ ​បញ្ហា​អ៊ុយក្រែន​ជា​ការ​ផ្ទុះ​ឡើង​នូវ​ទំនាស់​ក្នុង​រយៈពេល​ជាច្រើន​ឆ្នាំ​ ដើមចម​នៃ​កា​រប៉ះទង្គិច​គឺ​ស្ថិតនៅត្រង់​បញ្ហា​សន្តិសុខ​អឺរ៉ុប​ ការអនុវត្ត​របស់​អង្គការ​ណាតូ​ដែល​វាតទីទៅ​​ខាងកើត​ដោយគ្មានការ​រឹតត្បិត​​គឺ​ត្រូវ​គិពិចារណា​​ឡើងវិញ​។​

  ​​លោក​ Wang Wenbin បាន​សង្កត់ធ្ងន់​ទៀតថា​ ​តៃវ៉ាន់ជា​ផ្នែកមួយ​ដែល​មិនអាច​កាត់ផ្តាច់​បាន​នៃទឹកដីចិន​ ​វា​មានភាពខុសគ្នា​ទាំងស្រុង​ជាមួយ​អ៊ុយក្រែន​ដែល​ជា​ប្រទេសមាន​​​អធិបតេយ្យភាពមួយ​៕