ស្រុកហ្វូយួនខេត្តយូណាន ឧទ្យានឧស្សាហកម្មធ្វើឱ្យកសិករក្លាយទៅជាកម្មករ

កាលពីមុន  គ្រួសាររបស់លោក Xiao Rui ជាគ្រួសារក្រីក្រដែលបានចុះបញ្ជីឈ្មោះក្នុងស្រុកហ្វូយួនទីក្រុងឈូជីនខេត្តយូណាន លោក Xiao Rui បានធ្វើការនៅខេត្តក្រៅជាច្រើនឆ្នាំ  នៅឆ្នាំ២០១៦ លោកបានត្រឡប់មកស្រុកកំណើតវិញដើម្បីចូលធ្វើការក្នុងឧទ្យានឧស្សាហកម្មហ្វូយួន  លោកបានទទួលប្រាក់ខែជាង៧០០ដុល្លារអាមេរិក  ថែមទាំងបាននៅក្បែរសមាជិកគ្រួសារទៀតផង  លោកសប្បាយរីករាយណាស់។

សូមបញ្ជាក់ថា  ឧទ្យានឧស្សាហកម្មហ្វូយួនគម្រោងទំហំផ្ទៃដីមាន ៣៧.៣៦ គីឡូម៉ែត្រការ៉េ  តម្លៃផលិតឧស្សាហកម្មនៅឆ្នាំ២០១៩សរុបដល់ ១៧៨៤ លានដុល្លារអាមេរិក។ គិតត្រឹមបច្ចុប្បន្ន  ក្នុងឧទ្យានទាំងមូល មានសហគ្រាសសរុបចំនួន៤៦  ហើយផ្តល់កន្លែងការងារចំនួន១០៦៧២កន្លែង។

ការអភិវឌ្ឍន៍ឧទ្យានឧស្សាហកម្មក៏ធ្វើឱ្យជីវភាពរស់នៅរបស់អ្នកភូមិប្រែប្រួលកាន់តែល្អប្រសើរ  ជាដំបូងរោងចក្រទើបសាងសង់ឡើង   ភូមិនៅជុំវិញនៅតែក្រីក្រ  ក្នុងភូមិអ្នកជិះម៉ូតូក៏មិនសូវមានដែរ តែឥឡូវនេះ កម្មករនៅទីនេះភាគច្រើនបើកឡានមកធ្វើការ  ពេលខ្លះឡានច្រើនពេកពិបាករកកន្លែងចតក៏​មាន។

ឆ្នាំនេះដោយសារទទួលឥទ្ធិពលពីការរាតត្បាតជំងឺកូវីដ១៩  ស្រុកហ្វូយួនមិនជួបបញ្ហារកកម្មករធ្វើការនោះទេ  ដោយសារកម្មករក្នុងឧទ្យានឧស្សាហកម្មសុទ្ធតែរស់នៅក្នុងភូមិនៅជុំវិញ  រោងចក្រជាច្រើនបានបើកដំណើរការមុនគេ៕