ក្នុងវិទ្យាស្ថានពេទ្យចិនសែយូណានឆ្នាំទី១មាន“និស្សិត”ម្នាក់ដែលមានអាយុ៤២ឆ្នាំឈ្មោះ Zhang Chenggang លោក Zhang មកពីទីក្រុង Yibin ខេត្ត Sichuan ជាកម្មករសួនច្បារក្នុងវិទ្យាស្ថាន។ តាំងពីតូចបានចូលចិត្តវេជ្ជសាស្ត្រចិនសែ ក៏ប៉ុន្តែដោយសារជីវភាពរស់នៅក្រីក្រ គាត់រៀនដល់វិទ្យាល័យក៏លាឈប់ពីការសិក្សាដើម្បីទៅធ្វើការ ក្នុងរយៈពេល២០ឆ្នាំកន្លងមក លោក Zhang បានរៀនវេជ្ជសាស្ត្រចិនសែរហូត ទោះពីជានៅកន្លែងណា។ នៅដើមឆ្នាំនេះ លោក Zhang មកកាន់វិទ្យាស្ថានពេទ្យចិនសែធ្វើការ គាត់បានទិញសៀវភៅរៀនពីហាងលក់សៀវភៅក្នុងសាលា ដើម្បីសិក្សាចំណេះដឹងមូលដ្ឋាននៃវេជ្ជសាស្ត្រចិនសែជាមួយនិស្សិតឆ្នាំទីមួយ។
“ក្នុងមួយសបា្តហ៍ពួកយើងអាចឈប់សម្រាកពីរថ្ងៃ ខ្ញុំនឹងយកមួយថ្ងៃសម្រាប់ធ្វើការ អីចឹងពេលធម្មតាខ្ញុំទៅរៀនក៏មិនរំខានការងារខ្ញុំឡើយ។” ចំពោះការងារក្នុងវិទ្យាស្ថានពេទ្យចិនសែយូណាន លោក Zhang ពិតជាអាឡោះអាឡៃណាស់។
រាល់ថ្ងៃក្រោយពីចេញពីការងារលោក Zhang ត្រូវទៅកាន់បណ្ណាល័យដើម្បីរៀនសារឡើងវិញចំណេះដឹងដែលបានសិក្សាឬរៀនមុនមេរៀនក្រោយ។ រាល់ថ្ងៃនាព្រឹកម៉ោង៥ លោក Zhang ត្រូវក្រោកពីគេងទន្ទេញសៀវភៅដោយសារមានចំណេះដឹងត្រូវចាំច្បាស់ជាច្រើនក្នុងវេជ្ជសាស្ត្រចិនសែ ដល់ព្រឹកម៉ោង៧បានចេញពីផ្ទះទៅធ្វើការ ក្នុងមួយថ្ងៃត្រូវធ្វើការអស់រយៈពេល៨ម៉ោង ទោះបីជានឿយហត់យ៉ាងណា តែលោក Zhang យល់ឃើញថា ៖“ខ្ញុំអាចសិក្សាចំណេះវិជ្ជាពេទ្យចិនសែដោយមានលក្ខណ:ជាប្រព័ន្ធនៅទីនេះ ហើយសុបិនរបស់ខ្ញុំក៏ខិតជិតបានសម្រេចថែមទៀតដែរ។”
ធ្វើការងារផងនិងសិក្សាផង លោក Zhang និយាយថានេះមិនមែនជារឿនពិបាកណាឡើយ ដោយសារមានសេចក្តីស្រឡាញ់ដល់ពេទ្យចិនសែ គ្រាន់តែរៀនដោយខិតខំប្រឹងប្រែងនិងអស់ពីកម្លាំងកាយចិត្ត អ្វីដែលពិបាកក៏អាចដោះស្រាយទាំងអស់បាន លោក Zhang មានសុបិនធំបំផុតនោះគឺក្រោយពីសិក្សាបានជោគជ័យ គាត់អាចព្យាបាលអ្នកជម្ងឺដោយប្រើប្រាស់វេជ្ជសាស្ត្រចិនសែ៕